चंद्रपूर- कोरोनामुळे संपूर्ण देशात लॉकडाऊन सुरू आहे. या काळात जमावबंदी करण्यात आली आहे. अशा परिस्थितीत देखील आम आदमी पार्टीच्या वतीने बुधवारी एक अनोखे आंदोलन करण्यात आले. हे आंदोलन एकत्रित न जमता ऑनलाईन व्हिडिओच्या माध्यमातून करण्यात आले. या माध्यमातून सामान्य नागरिकांचे वीजबिल माफ करावे, ही मागणी करण्यात आली.
वीज बील माफ करावे, ही मागणी करताना आप कार्यकर्ते, नागरिक
कोरोनाचा प्रादुर्भाव रोखण्यासाठी सुरू करण्यात आलेल्या सततच्या लाॅकडाऊनमुळे सामान्य नागरिकांपुढे आर्थिक संकट उभे राहिले आहे. त्यांना रोजगार नसल्याने उदरनिर्वाहाचा देखील प्रश्न निर्माण झाला आहे. उत्पन्नाचे कुठलेही साधन नसल्याने वीजबिल देखील भरने कठीण झाले आहे. अशावेळी या गरीब लोकांचे वीजबिल माफ करण्यात यावे, ही मागणी घेऊन आम आदमी पार्टीच्या वतीने अनोखे आंदोलन करण्यात आले. राज्यभरात आम आदमी पार्टीच्या कार्यकर्त्यांनी हे आंदोलन केले.
आम आदमीच्या या आंदोलनात हजारो कार्यकर्त्यांसह नागरिकांनीही सहभाग नोंदवला. '#वीज_बिल_माफ_करा' हा हॅश टॅग वापरून राज्यभर ट्विटरवर हजारो नागरिकांचे व्हिडिओ अपलोड करण्यात आले. तसेच फेसबुक, व्हाट्सअपवरून सुद्धा हे आंदोलन झाले. चंद्रपूर जिल्हा आदमी पार्टीचे जिल्हा अध्यक्ष सुनिल मुसळे यांच्या नेतृत्वात जिल्हाधिकारी डॉ. कुणाल खेमणार यांना निवेदन देण्यात आले.