बुलडाणा - हैदराबादमध्ये डॉक्टर महिलेवर झालेल्या अत्याचाराची घटना डिसेंबर महिन्याच्या पहिल्या आठवड्यात समोर आली होती. यानंतर जळगाव जामोद तालुक्यात खेर्डा या गावातील हृदयद्रावक घटनेने परिसरात खळबळ उडाली आहे.
या ठिकाणी एका घरात 50 वर्षीय महिलेचा विवस्त्रावस्थेत मृतदेह सापडला असून घटनास्थळ आणि या ठिकाणची परिस्थिती पाहता महिलेवर बलात्कार झाल्याचा संशय व्यक्त करण्यात येत आहे. पोलिसांनी अद्याप या प्रकाबद्दल सविस्तर बोलण्यास नकार दिला असून पुढील तपास सुरू आहे.
खेर्डा येथे शनिवारी(दि.07 डिसेंबर)ला सकाळी एका 50 वर्षीय महिलेचा विवस्त्र अवस्थेत मृतदेह सापडल्याची बातमी परिसरात पसरताच एकच खळबळ उडाली.
संबंधित महिला ही खेर्डा येथील रहिवासी असून ती दिव्यांग आहे. या अविवाहित महिलेच्या पोटावर तीक्ष्ण हत्याराने वार करुन तिची निर्घृण हत्या करण्यात आल्याची माहिती पोलिसांनी दिली. यानंतर तिला विवस्त्र अवस्थेत टाकून देण्यात आल्याने शारीरिक आत्याचाराचा संशय व्यक्त होत आहे.
घटनेची माहिती मिळताच जळगाव-जामोद पोलीस घटनास्थळी दाखल झाले. अद्याप पोलीस तपास सुरू असल्याने अधिकाऱ्यांनी विस्तृत माहिती देण्यास नकार दिला आहे.