बुलडाणा- बहिणीकडे आलेल्या १४ वर्षीय बालिकेवर पाच तरुणांनी लैंगिक अत्याचार केल्याची धक्कादायक घटना बुधवारी रात्री उघडकीस आली आहे. या घटनेनंतर बालिकेच्या कुटुंबीयांनी पोलिसात तक्रार नोंदवली आहे. याप्रकरणी पोलिसांनी मुख्य आरोपीसह दोघांना अटक केली आहे. तर इतर तीन आरोपी फरार आहेत. आरोपींना न्यायालयाने 1 दिवसाची पोलीस कोठडी सुनावली आहे.
पीडित बालिका बुलडाणा जिल्ह्यातील मोळा तालुका मेहकर येथून धाड बस स्थानकावर आपल्या बहिणीकडे जाण्यासाठी आली. बालिकेला एकटी पाहून आरोपी राहुल लोखंडे याने तिला आपल्या मोटरसायकलवर बळजबरीने बसवले. त्यानंतर जवळच्या करडी धरणाच्या क्षेत्रात नेऊन तिच्यावर अत्याचार केला. शिवाय या ठिकाणी फोन करून आरोपी सागर गुजर, अहाय पवार, शुभम पांदे आणि गणेश जाधव या मित्रांना बोलावले. त्यांनीही पीडितेवर आळीपाळीने अत्याचार केला.
घटनेची तक्रार पोलिसात केल्यानंतर पोलिसांनी घटनेचे गांभीर्य ओळखून यातील मुख्य आरोपी राहुल लोखंडे याच्यासह शुभम पांदे व गणेश जाधव या तिघांना अटक केली. तर सागर गुजर आणि अहाय पवार हे आरोपी फरार आहेत. सर्व आरोपींविरुद्ध पॉस्को कायद्यासह बलात्काराचा गुन्हा दाखल करण्यात आला आहे. सदर तिन्ही आरोपींना बुलडाणा जिल्हा न्यायालयासमोर उभे करण्यात आले. पोलिसांकडून मागितलेल्या 7 दिवसांच्या पोलीस कोठडीपैकी न्यायालयाने आरोपींना 1 दिवसाची पोलीस कोठडी सुनावली आहे.