बुलडाणा - नऊ महिन्याच्या गर्भवतीला प्रसूतिकळा नसताना ही एका एमबीबीएस डॉक्टरने जबरदस्ती निर्दयपणे प्रसूति केली. प्रसूती दरम्यान बाळाचा मृत्यू झाल्याची घटना बुलडाणा जिल्ह्यातील जळगाव जामोद येथे घडली. हा प्रताप तालुका वैद्यकीय अधिकाऱ्यांच्या पतीने केल्याचा आरोप आसलगांव येथील संजय रामदास भोंगाळे यांनी केला आहे. डॉ. अविनाश पाटील या डॉक्टरावर कारवाईसाठी त्यांनी जळगाव जामोद पोलिसात तक्रार दाखल केली आहे. मात्र, पोलिसांनी संबधित डॉक्टरविरोधात कुठलीच कारवाई केली गेली नसून पीडित दाम्पत्यांनी न्यायाची मागणी केली आहे.
प्रसूतिकळा नसताना डॉक्टरकडून प्रसूती, बाळाचा मृत्यू जळगाव जामोद तालुक्यातील आसलगाव येथील शारदा भोंगाळे या महिलेचे प्रसूति संदर्भातचा उपचार जळगाव जामोद येथील महिला डॉ. उज्वला पाटील यांच्यकडे सुरू होता. डॉ. उज्वला पाटील ह्या शासकीय सेवेत असून त्या तालुका वैद्यकीय अधिकारी म्हणून जळगांव जामोद याठिकाणी कार्यरत आहेत. मात्र, डॉ, उज्वला पाटील यांच्या व त्यांचे पती डॉ.अविनाश पाटील यांच्या समाधान हॉस्पिटल, सोनोग्राफी सेंटर, मॅटर्निटी व नर्सिग होममध्ये वेळोवेळी गर्भवती महिलेची सोनोग्राफी काढण्यात आली. यावेळी बाळाची प्रकृती चांगली असल्याची सांगत नवव्या महिण्यात सदर महिलेला प्रसूतीची वेळ डॉ. उज्वला पाटील यांच्याकडून देण्यात आल्याने गरोदर महिला शारदा भोंगाळे तेथे १७ जूनला दाखल झाली. यावेळी तेथे डॉ. उज्वला पाटील उपस्थित नसल्याने त्यांचे पती डॉ. अविनाश पाटील यांनी त्या महिलेस प्रसूतीच्या कळा येत नसतानाही तिची जबरदस्तीने प्रसूती केली. वेळेपूर्वी डॉ. अविनाश यांनी प्रसूती केल्याने बाळाचा मृत्यू झाल्याचा आरोप महिलेचा पती संजय भोंगाळे यांनी केला. त्यानंतर त्यांनी २६ जूनला जळगांव जामोद पोलीस ठाण्यात तक्रार दाखल करुन डॉ. अविनाश पाटील विरुद्ध कारवाई करण्याची मागणी केली. पोलिसांनी भोंगाळे यांच्या तक्रारीची दखल घेऊन कारवाई केली नसल्याचा आरोप भोंगाळे यांनी करुन न्यायाची मागणी केली आहे.
डॉक्टरविरुद्ध आलेल्या तक्रारीची चौकशी जिल्हा शल्यचिकित्सक करत असतात. त्यांचा अहवाल आल्यानंतरच डॉक्टरावर कारवाई करण्यात येते. या प्रकरणात देखील जिल्हा शल्यचिकित्सक यांचा अहवाल आल्यानंतर कारवाई करण्यात येईल, अशी माहिती जळगांव जामोदचे पोलीस निरीक्षक सुनील जाधव यांनी दिली.
कळा आल्यानंतरच वैद्यकीय नियमानुसार प्रसूती केली - डॉ. अविनाश पाटील
शारदा भोंगाळ या महिलेला प्रसूतीकळा येत असल्याने वैद्यकीय नियमानुसार प्रसूति केली आहे. मी कुठलेही चूक केली नसून मातेच्या पोटातच बाळाच्या नाळेला गाठ पडली होती, अशी प्रतिकिया यांनी दिली.
तक्रार प्राप्त होताच चौकशी केली जाईल - डॉ. प्रेमचंद पंडित
या घटनेची तक्रार माझ्यापर्यंत पीडित महिला किवा पोलिसांनी अद्यापपर्यंत दिली नाही. माझ्याकडे तक्रार प्राप्त होताच चौकशी करुन दोषी आढळल्यास कारवाई केली जाईल.
