बुलडाण्यात 'ब्रेक द कोरोना चैन' मोहीम; पोलीस अधीक्षक स्वतः उतरले रस्त्यावर

बुलडाणा जिल्ह्यातील कोरोनाची साखळी तोडण्यासाठी ''ब्रेक द कोरोना चैन' ही मोहीम राबवण्यात येत आहे. यासाठी स्वतः बुलडाण्याचे पोलीस अधीक्षक डॉ. दिलीप भुजबळ-पाटील रस्त्यावर उतरुण कारवाई करत आहेत.

बुलडाणा - कोरोनाची रुग्णांची संख्या वाढू लागल्याने बुलडाणा जिल्ह्यात प्रशासनाने ब्रेक द कोरोना चैन मोहीम सुरु केली आहे. याअंतर्गत 21 जुलैपर्यंत दुपारी 3 नंतर लॉकडाऊन करण्यात आले आहे. लॉकडाऊन काळात बाहेर फिरणाऱ्यांकरता बुलडाणा जिल्ह्याचे पोलीस अधीक्षक डॉ. दिलीप भुजबळ-पाटील यांनी ऑल आऊट ऑपरेशन सुरू केले आहे. ते स्वतः थेट रस्त्यावर उतरुन संचारबंदीचे उल्लंघन करणाऱ्या दुचाकी, चारचाकी वाहनधारकांवर कारवाई करत आहेत.

घराबाहेर पडताना मास्क परिधान न करणारे, सार्वजनिक जागी थुंकणारे, डबल सिट दुचाकी चालवणारे यांच्यावर दंडात्मक कारवाई करण्याचे आदेश असून 7 ते 21 जूलै पर्यंत दुपारी 3 वाजेपर्यंत संपूर्ण लॉकडाऊन असल्याने कठोर पावले प्रशासनाकडून उचलण्यात आली आहेत. असे असताना ही दुपारी 3 नंतर काहीजण रस्त्यावर फिरत अससल्याचे निर्दशनास येत आहे. त्यामुळे शहरातील मुख्य रस्त्यावर प्रत्येक चौकात ठाणेदार प्रदीप साळुंखे यांच्या नेतृत्वात पोलिसांची चोख नाकाबंदी सुरू केली आहे.

हेही वाचा -एका फटक्यात पोलिसांनी उतरवला विकास दुबेचा माज! पाहा व्हिडिओ...

दुचाकी, चारचाकी वाहनधारकांची कसून चौकशी पोलिसांकडून होत आहे. विशेष म्हणजे, ज्यांनी लॉकडाऊनचे नियम तोडले त्यांच्यावर गुन्हा दाखल होत आहे. अशतच आता जिल्ह्याचे सिंघम म्हणून ओळखले जाणारे जिल्हा पोलीस अधीक्षक डॉ. दिलीप भुजबळ-पाटील हे बुधवारी 8 जुलै रोजी थेट रस्त्यावर उतरून बुलडाणा शहर पोलीस स्टेशन समोर संध्याकाळी 5 वाजेपासून लॉकडाऊनचे नियम तोडणाऱ्या वाहन धारकांवर ऑल आऊट ऑपरेशनच्या माध्यमातून कारवाई करत होते. या ऑल आऊट ऑपरेशन मधून 7 हजार नियम भंग केलेल्या कारवाया आणि त्यातून तब्बल 10 लाखांच्यावर दंड आकारण्यात आला आहे.