भंडाऱ्यातील वैशालीनगरमध्ये ९ दिवसांपासून पाण्याचा ठणठणाट, नागरिकांची भटकंती

या परिसरात पाणीपुरवठा करणारी पाईपलाईन खोदून ठेवल्याने पाण्याची समस्या उद्भवली आहे. नव्याने बसवलेल्या पाईपलाईनला जुनी पाईपलाईन जोडायची असल्याने ती खोदून ठेवली आहे.

भंडारा- शहरातील वैशालीनगरमध्ये मागील ९ दिवसांपासून पाणी येत नसल्याने नागरिकांची पाण्यासाठी भटकंती सुरू आहे. शहरात पाणी टंचाई आहे. खासगी बोअरवेलही आटले आहेत. त्यात नगर पालिकेच्या ढिसाळ नियोजनामुळे वैशाली नगरातील लोकांना नाहक त्रास सहन करावा लागत आहे. मात्र, प्रशासन या समस्येवर काहीही बोलण्यास तयार नाही.

या परिसरात पाणीपुरवठा करणारी पाईपलाईन खोदून ठेवल्याने पाण्याची समस्या उद्भवली आहे. नव्याने बसवलेल्या पाईपलाईनला जुनी पाईपलाईन जोडायची असल्याने ती खोदून ठेवली आहे. मात्र, पाईपलाईन जोडली नसल्याने मागील ९ दिवसांपासून नागरिकांना पाण्यासाठी भटकंती करावी लागत आहे. याविषयी नगर परिषद अधिकारी काहीही बोलण्यास तयार नाही.

पाण्याची अडचण असल्याने या भागात टँकर येतो. मात्र, २ दिवसातून एकदा आणि तोही केवळ २०० लिटर पाणी देतो. एवढ्या पाण्यात कुटुंबाची गरज भागविणे कठिण जाते. त्यामुळे दुरून मिळेल त्या ठिकाणावरून नागरिक पाणी भरतात. वैशालीनगर परिसरात पाणी येत नसल्याने नागरिकांनी याविषयीची तक्रार नगरपरिषदेच्या अधिकाऱ्यांना केली. मात्र, नऊ दिवसानंतर ही नळाला पाणी आलेले नाही.

मागील वर्षी कमी पावसामुळे लोकांना फेब्रुवारी पासूनच पाण्याची अडचण जाणवू लागली होती. लोकांच्या खासगी विहिरी, बोरवेल आटल्या होत्या. त्यामुळे नागरिक मिळेल त्या पाण्यावर गरज भागवत होते.