अड्याळ येथील पोलीस उपनिरीक्षकाला कोरोनाची लागण, स्थानकाला लावले कुलूप

भंडारा जिल्ह्यात आतापर्यंत 1652 लोकांचे घशातील नमुने तपासणीसाठी पाठविले होते. त्यापैकी 1462 अहवाल निगेटिव्ह आले असून 26 अहवाल पॉझिटिव्ह आले आहेत. 164 अहवाल अजूनही अप्राप्त आहेत. सध्या आयसोलेशन वार्डमध्ये 41 व्यक्ती भरती आहेत. 1 कोरोनाबाधित रुग्ण बरा झाला असून 25 रुग्णांवर उपचार सुरू आहेत.

भंडारा- जिल्ह्यात पुन्हा दोन नवीन कोरोना बाधित रुग्ण सापडले आहेत. यामध्ये एका पोलीस उपनिरीक्षकाचा समावेश असल्याने पोलीस विभागात खळबळ उडाली आहे. पवनी तालुक्याच्या सीमेवर आपले कर्तव्य बजावीत असताना त्यांना कोरोनाची लागण झाली असावी, असा अंदाज आहे. या दोन रुग्णांसह जिल्ह्याची एकूण कोरोनाबाधित रुग्णांची संख्या 26 वर गेली आहे.

अड्याळ पोलीस स्टेशनमध्ये कार्यरत पोलीस उपनिरीक्षक पवनीच्या सीमेवर कार्यरत होते. या सीमेवरून जिल्ह्यात आलेले तीन जण कोरोना पॉझिटिव्ह आढळले आहेत. साकोली तालुक्यातील एक रुग्ण हा 26 तारखेला पॉझिटिव्ह आल्यानंतर त्यादरम्यान कार्यरत असलेल्या पोलीस अधिकारी आणि कर्मचारी यांना लगेच सिंदेवाही येथे अलगीकरण कक्षात ठेवले होते. त्यांचे घशाचे स्वॅब तपासणीसाठी पाठविले होते. यापैकी एक पोलीस निरीक्षकाच्या अहवाल पॉझिटिव्ह आला तर दुसऱ्या पोलीस निरीक्षकाचा अहवाल निगेटिव्ह आला आहे. यानंतर अड्याळ पोलीस स्टेशनला कुलूप लावण्यात आले आहे.

पोलीस निरीक्षक सीमेच्या चौकीवर कार्यरत असतांना बरेचदा कामानिमित्त अड्याळ पोलीस स्टेशनला आले होते. त्यामुळे किती कर्मचारी अधिकारी त्यांच्या संपर्कात आले, यानुसार त्या लोकांची यादी तयार करून त्यांना विलगिकरण कक्षात ठेवले जाईल.

दुसरा कोरोनाबाधित रुग्ण हा लाखांदूर तालुक्यातील असून तो देखील क्वारंटाईन सेंटरमध्ये होता. आतापर्यंत 1652 लोकांचे घशातील नमुने तपासणीसाठी पाठविले होते. त्यापैकी 1462 अहवाल निगेटिव्ह आले असून 26 अहवाल पॉझिटिव्ह आले आहेत. 164 अहवाल अजूनही अप्राप्त आहेत. सध्या आयसोलेशन वार्डमध्ये 41 व्यक्ती भरती आहेत. 1 कोरोनाबाधित रुग्ण बरा झाला असून 25 रुग्णांवर उपचार सुरू आहेत.