आईच्या भटकणाऱ्या आत्म्याला भोंदूबाबा मिळवून देणार होता शांती, तरुणीने . . . . .

भोंदूबाबाची प्रेयसी गीतिशा आरमोरीकरने या तरुणीला फोन करून तुझ्या आईचा मृत्यू जादूटोण्यामुळे झाला असून तुझ्या भावाचाही मृत्यू तसाच होणार असल्याची भीती दाखवली. त्यानंतर भोंदूबाबाने आईच्या आत्म्याला शांती मिळवून तिच्याशी बोलणं करुन देण्यासाठी अघोरी पूजा करण्यास सांगितले.

भंडारा- आईच्या भटकणाऱ्या आत्म्याला शांती मिळवून देण्यासाठी भोंदूबाबाने अघोरी पूजा करण्याची गळ तरुणीला घातली. मृत आत्म्याशी बोलणं करुन देण्याचंही तरुणीला भोंदूबाबानं आश्वासन दिलं. . . भावनेच्या भरात तरुणीनं पूजा करण्याचे मान्यही केले. मात्र आपली फसवणूक होत आल्याचं लक्षात येताच तिनं सावध पवित्रा घेत पोलीस ठाण्याचा दरवाजा ठोठावला. पोलिसांनी भोंदूबाबासह प्रेयसीलाही बेड्या ठोकल्या. एक निरागस तरुणी भोंदूबाबाची शिकार होताहोता वाचल्याची ही घटना भंडाऱ्यात उघडकीस आली. जितू उर्फ लकी मेश्राम असे अटक केलेल्या भोंदूबाबाचे नाव असून त्याची प्रेयसी गीतिशा आरमोरीकरलाही पोलिसांनी बेड्या ठोकल्या.

तक्रारदार तरुणीच्या आई-वडिलांचा मृत्यू झालेला आहे. ती लहान भावासह राहत आहे. या संधीचा फायदा घेत गीतिशा आरमोरीकरने या तरुणीला फोन करून तुझ्या आईचा मृत्यू हा जादूटोण्यामुळे झाला असून तुझ्या भावाचाही मृत्यू तसाच होणार आहे. तुझ्या आईच्या आत्म्याला शांती मिळवून देण्यासाठी आणि तुझ्या आईशी तुझे बोलणे करून देण्यासाठी एक पूजा करावी लागेल. माझ्या ओळखीचे एक बाबा आहेत, तू माझ्या सोबत राजनांदगाव येथे चल, असे सांगितले. सुरुवातीला आई-भावाची भीती दाखविल्याने तरुणीने भावनेपोटी विचार केला. मात्र नंतर या सर्व खोट्या गोष्टी असतात. त्यामुळे माझी फसवणूक करण्याचे प्रयत्न होत असल्याचे तिच्या लक्षात आले. तिने लगेच याविषयीची माहिती आपल्या एका मित्राला दिली. त्यानंतर त्यांनी भंडारा पोलीस अधिक्षकांची भेट घेतली. घटनेची माहिती मिळताच पोलिसांनी प्रकरण गांभीर्याने घेतले. या तरुणीच्या माध्यमातून आरोपींना अटक करण्यासाठी पोलिसांनी एक योजना तयार केली.

पोलिसांनी तयार केलेल्या योजनेनुसार तरुणीने पूजा करण्याची अट मान्य केली. मात्र, राजनांदगावला न जाता पवनी येथे पूजा करण्याची अट ठेवली. त्यासाठी आरोपीने मागितलेल्या एकतीस हजार रुपयांपैकी वीस हजार रुपये बँकेत जमाही केले. राजनांदगाव येथील जितू उर्फ लकी मेश्राम याला आणि पवनीतील गीतिशा आरमोरीकरला पवनीतील जंगलात अघोरी पूजा करताना रंगेहात अटक करण्यात आली आहे.

भोंदूबाबा जितू उर्फ लकी मेश्राम हा व्यवसायाने चालक आहे. त्याचे पवनी येथील गीतिशा आरमोरीकरशी प्रेम संबंध होते. याच प्रेमसंबंधाचा फायदा घेत जितू मेश्रामच्या सांगण्यावरून गीतिशा ही एकट्या मुलींना आणि महिलांना फसविण्याचे काम करीत असे. तिने मलाही संपर्क करून फसविण्याचे प्रयत्न केले. मात्र हे षडयंत्र माझ्या लक्षात आले. सतर्कता दाखवीत मी हे अंधश्रद्धेचे षडयंत्र हाणून पाडले. त्यामुळे माझी ही फसवणूक झाली नाही. पुढे ज्या मुलींना फसविले जाणार होते, त्यांनाही मी वाचवू शकले, अशी प्रतिक्रिया तक्रारदार तरुणीने दिली.

या दोघांना अटक केल्यानंतर त्यांच्याकडे घुबडाचे पाय, लिंबू, हाडांच्या मण्यांची माळ, शेंदूर, दारू, कोंबडा, डमरू, आदी सामान मिळाले. त्यांच्यावर जादूटोणा प्रतिबंधित कायदा 2013 कलम 3, 2 अन्वये गुन्हा दाखल करम्यात आला आहे. आरोपींना न्यायालयात हजर केले असता, न्यायालयाने त्यांना 20 तारखेपर्यंत पोलीस कोठडी ठोठावल्याची माहिती पोलीस निरीक्षक यशवंत सोलसे यांनी दिली आहे.