काय हे गुरुजी.. पर्मनंट शिक्षकाने स्वतःचा विषय शिकवण्यासाठी पैसे देऊन ठेवले शिक्षिकेला

भंडाऱयातील जिल्हा परिषद जकातदार माध्यमिक आणि उच्च माध्यमिक विद्यालयातील शिक्षक व्ही. एन. भोयर हे विज्ञानाचे शिक्षक आहेत. ते वर्ग पाचवी ते आठवीपर्यंत शिकवतात. मात्र, या शिक्षकाने स्वतःच्या हाताखाली एका खासगी शिक्षिकेला 4 हजार रुपयात नेमले होते.

भंडारा - शहरातील एका जिल्हा परिषद शाळेतील शिक्षकाने स्वतःचा विषय शिकवण्यासाठी अवैध पद्धतीने एका शिक्षिकेला नेमले होते. याची माहिती मिळताच मुख्य कार्यपालन अधिकारी यांनी शिक्षणाधिकाऱ्यासह अचानक शाळेला भेट दिली. चौकशी केली असता, हा सर्व प्रकार खरा असल्याचे समोर आले आहे. त्यानंतर या शिक्षकावर कोणती कारवाई होते, याकडे सर्वांचे लक्ष लागले आहे.

भंडाऱ्यातील जिल्हा परिषद जकातदार माध्यमिक आणि उच्च माध्यमिक विद्यालयातील शिक्षक व्ही. एन. भोयर हे विज्ञानाचे शिक्षक आहेत. ते वर्ग पाचवी ते आठवीपर्यंत शिकवतात. मात्र, या शिक्षकाने स्वतःच्या हाताखाली एका खासगी शिक्षिकेला 4 हजार रुपयात नेमले होते. ही शिक्षिका भोयर यांची सर्व तासिका घेत होती, तर शिक्षक शाळेत येऊन फक्त स्वाक्षरी करत होते. या विषयीची त्यांची या अगोदरही तक्रार झाली आहे. मात्र, त्यांच्यावर अजूनपर्यंत कधीही कारवाई केली नाही.

हा सर्व प्रकार नव्याने आलेल्या मुख्य कार्यपालन अधिकारी भुवनेश्वरी यांना शुक्रवारी कळताच त्यांनी त्वरित शिक्षणाधिकारी पाच्चपुरे यांच्यासह जकातदार शाळेला अचानक भेट दिली. मुख्य कार्यपालन अधिकारी शाळेत आल्याचे कळताच शिक्षकांचे धाबे दणाणले, नेमके काय झाले हे समजण्याच्या पहिलेच अधिकारी वर्गात पोहचले आणि त्यांनी माहिती घेतली. तेव्हा हा प्रकार सुरू असल्याचे समोर आले आहे. या विषयी संपूर्ण चौकशीचे आदेश शिक्षणाधिकाऱ्यांना देऊन मुख्य कार्यपालन अधिकारी निघून गेल्या.

शिक्षणाधिकारी यांना या विषयी विचारले असता, त्यांनीही या प्रकाराला दुजोरा दिला. मात्र, चौकशी सुरू असल्याने बोलण्यास नकार दिला आहे. चौकशीनंतरच पुढे येईल की या प्रकरणात कोणावर आणि नेमकी कोणती कार्यवाही होणार, तोपर्यंत या शाळेतील मुख्याध्यापकासह सर्वांचीच धाकधूक वाढली आहे. या शिक्षकाला वयोमानानुसार बरं नसल्याने त्यानेच ही शिक्षिका ठेवली होती, अशी माहिती पुढे आली आहे. पण, जर त्यांना बरं नाही तर त्यांनी उपचार घ्यावे किंवा निवृत्ती घ्यावी, त्यामुळे इतर तरुण तरुणींना संधी मिळू शकेल. मुळात जिल्ह्यात असा प्रकार अजूनही बऱ्याच शाळेत होत असून विशेषतः दुर्गम ग्रामीण भागातील शाळेतील शिक्षक स्वतः 70 ते 80 हजार पगार घेतात आणि आपल्या जागेवर शिकवणी घेण्यासाठी 4 ते 5 हजार रुपयांमध्ये बेरोजगार तरुण तरुणींना कामावर ठेवतात आणि दिवसभर इतरत्र पैसे कमवण्याचे काम करत असतात. त्यामुळे या शिक्षकावर कोणती कारवाई होणार हे पाहणे महत्वाचे असणार आहे.

हेही वाचा -