पालकमंत्री परिणय फुके यांचे जिल्ह्यात जंगी स्वागत

परिणय फुके यांना वने, सार्वजनिक बांधकाम व आदिवासी विकास राज्यमंत्री पद तसेच भंडारा जिल्ह्याचे पालकमंत्री पद मिळाल्याने जिल्ह्यातील भाजप कार्यकर्त्यांमध्ये उत्साह आहे. यानिमित्ताने जिल्ह्यात विविध ठिकाणी त्यांचे जंगी स्वागत करण्यात आले.

भंडारा- भंडारा-गोंदिया विधानपरिषदचे आमदार परिणय फुके यांना नुकतेच राज्यमंत्री पद मिळाले. तसेच शुक्रवारी रात्री त्यांना भंडारा जिल्ह्याच्या पालकमंत्री पदाचीही जबाबदारी सोपवण्यात आली. पालकमंत्री झाल्यानंतर शनिवारी पहिल्यांदाच फुके भंडारा जिल्ह्यात आले होते. यानिमित्ताने विविध ठिकाणी त्यांचे स्वागत आणि सत्कार करण्यात आला.
परिणय फुके यांना सार्वजनिक बांधकाम, वने, आदिवासी विकास राज्यमंत्री पद तसेच भंडारा जिल्ह्याचे पालकमंत्री पद मिळाल्याने जिल्ह्यातील भाजप कार्यकर्त्यांमध्ये उत्साह आहे. सुरुवातीला भंडारा जिल्ह्याच्या सीमेवरील पहिल्या गावात त्यांचे स्वागत केले गेले. नंतर विविध ठिकाणी स्वागत करीत शहरात त्यांचे आगमन झाले. त्यांनी त्रिमूर्ती चौकात डॉ. बाबासाहेब आंबेडकर यांच्या प्रतिमेला हार अर्पण केले. नंतर गांधी चौकात फटाके फोडून, ढोल ताश्याने त्यांचे स्वागत केले गेले.

नगर सेवक, नगराध्यक्ष आणि खासदार सुनील मेंढेंनी त्यांचा पुष्पगुच्छ देऊन स्वागत केले. यानंतर भाजपच्या सदस्य नोंदणी कार्यक्रमांत त्यांचे राज्यमंत्री आणि पालकमंत्री म्हणून स्वागत झाले. फुके यांचा कार्यकाळ अगदी अल्पवाढीचा असला तरी त्यांच्यामुळे भंडारा जिल्ह्यात भाजप कार्यकर्त्यांमध्ये एक नवीन ऊर्जा निर्माण झाली आहे.स्वागतानंतर फुके यांनी पत्रकार परिषदेचे आयोजन केले होते. येणाऱ्या काळात वनांचा विकास करून त्या माध्यमातून जिल्ह्यात रोजगार निर्मिती करण्याचा मानस आहे. नागझिरा अभयारण्यात पर्यटकांची संख्या वाढविण्याच्या दृष्टीने ताडोबाच्या धर्तीवर त्याचा विकास करण्याचे प्रयत्न राहतील. तसेच 5 वाघीण नागझिरच्या जंगलात बाहेरून आणण्याचा प्रस्ताव ठेवला आसल्याचे त्यांनी यावेळी पत्रकार परिषदेत सांगितले. पुढच्या काही दिवसात बरेच बदल जिल्ह्यात पाहायला मिळणार असल्याचे संकेत त्यांनी दिले आहेत. त्यामुळे नेमके कोणते बदल होणार आहे याची चर्चा नागरिकांमध्ये सुरू आहे.