सोन्याच्या लालसेपोटी मित्रांनीच केली मित्राची हत्या; भंडारा येथील घटना

अडीच तोळे सोन्याच्या लालसेपोटी तीन मित्रांनी मिळून एका मित्राची हत्या केल्याची धक्कादायक घटना पुढे आली आहे. याप्रकरणी पोलिसांनी आरोपींना अटक केली आहे.

भंडारा - केवळ अडीच तोडे सोन्याच्या लालसेपोटी तीन मित्रांनी मिळून एका मित्राची हत्या केल्याची धक्कादायक घटना पुढे आली आहे. एक डिसेंबर रोजी कोका जंगलात एका अनोळखी व्यक्तीचा मृतदेह कुजलेल्या अवस्थेत आढळून आला होता. केवळ 24 तासांच्या आत कारधा पोलिसांनी मृतदेहाची ओळख पटवून आरोपींना अटक केली. दयाराम पुंडलिक टिचकुले (50) असे मृत व्यक्तीचे नाव असून योगेश तितीरमारे (30), संजय काटेखाये (28) आणि नरेंद्र पुडके (42) सर्व राहणार रेंगेपार, ता. लाखणी, असे अटक करण्यात आलेल्या आरोपींचे नाव आहे.

26 तारखेला झाली होती हत्या -

भंडारा तालुक्यातील कारधा पोलीस ठाण्यांतर्गत येत असलेल्या कोका जंगलातील नवेगावच्या शिवारात एक कुजलेल्या अवस्थेत मृतदेह गावकऱ्यांना आढळून आला होता. पोलिसांनी घटनास्थळी जाऊन पंचनामा केला आणि त्यानंतर मृतदेह शवविच्छेदनासाठी पाठविण्यात आला. मात्र, मृतदेहाच्या चेहऱ्यावरील अर्धा भाग हा अगदी विद्रूप करून ठेवला असल्याने मृतदेहाची ओळख पटविणे पोलिसांना कठीण जात होते. त्याच्या अंगावरील कपड्यांमुळे मृतदेहाची ओळख पटली. मृतकाचा हा अवैध दारू विक्रीचा व्यवसाय होता, अशी माहिती समोर आली आहे.

अडीच तोळे सोन्यासाठी तीन मित्रांनी हत्या -

मृतक दयारामला सोने घालण्याची मोठी आवड होती. त्याच्या गळ्यामध्ये एक सोन्याची चेन आणि बोटांमध्ये सोन्याच्या अंगठ्या होत्या. एकूण अडीच तोळे सोने हे त्याच्या अंगावर होते. याच सोन्याच्या वस्तूंवर त्याच्या तीन मित्रांची नजर गेली. नेहमी त्याच्या सोबत राहणाऱ्या या तीन मित्रांनी दयारामच्या हत्येचा कट रचला. त्यांनी दयारामला दारू पाजली. त्यानंतर हे चौघे साकोलीच्या जंगलात गेले. तेथे त्यांनी गळा दाबून दयारामची हत्या केली. त्यानंतर त्यांनी मृतदेह जंगलात फेकून दिला. आरोपीने मृतकाच्या हातात व गळ्यात असलेल्या सोन्याच्या अंगठ्या व गोप काढून त्याचा मृतदेह नवेगाव जंगलातील शिवारात एका पुलाच्या पाईपमध्ये टाकून ठेवला. तसेच मृतकाचे दोन्ही मोबाईल जंगलात फेकून निघून गेले. या तिन्ही आरोपींनी गुन्हा कबूल केला असून त्यांच्यावर कलम 302, 201, 34 भादंविनुसार गुन्हा दाखल करण्यात आला आहे.