भंडाऱ्याचा पारा 46 डिग्रीवर, काही दिवसात मान्सूनपूर्व सरी बरसण्याची शक्यता

भंडाऱ्याचे कमाल तापमान 46 वर पोहोचले असून पुढचे काही दिवस नागरिकांना उष्णतेचे चटके सहन करावे लागणार आहेत. येत्या तीन दिवसात वादळी वाऱ्यासह मध्यम स्वरूपाचा पाऊस पडण्याची शक्यता हवामान खात्याने वर्तवली आहे.

भंडारा - भंडाऱ्याचे कमाल तापमान 46 वर पोहोचले असून उन्हाच्या तडाख्याने भंडारा जिल्ह्यातील लोकांचे जनजीवन विस्कळीत झाले आहे. पुढचे काही दिवस नागरिकांना उष्णतेचे चटके सहन करावे लागणार असून येत्या तीन दिवसात वादळी वाऱ्यासह मध्यम स्वरूपाचा पाऊस पडण्याची शक्यता हवामान खात्याने वर्तवली आहे.
संपूर्ण विदर्भामध्ये हवामान खात्याने रेड अलर्ट जारी केलेला आहे. मे महिन्याच्या शेवटी सूर्य जेव्हा रोहिणी नक्षत्रात प्रवेश करतो त्या कालावधीला नवतपा म्हणतात. हे नऊ दिवसांची सुरुवात 25 मे पासून झाली आहे. तर ते 3 जूनला संपणार आहे.

तापमानात प्रचंड वाढ झाली असून सध्या तापमान 46 डिग्रीपर्यंत पोहोचले आहे. सकाळी 8 वाजल्या पासूनच उष्णतेचा प्रभाव जाणवत आहे. त्यामुळे उन्हापासून बचाव करण्यासाठी नागरिक सकाळीच आपली काम पूर्ण करून उन्हाचा पारा वाढण्यापूर्वीच घरी परतण्याचा प्रयत्न करत आहेत.उकाड्यापासून सुटका करण्यासाठी नागरिक सावली आणि थंड हवेला बसणेच पंसद करत आहेत. वाढत्या तापमानामुळे शहरातील रस्ते निर्मनुष्य होत आहेत. पुढचे काही दिवस उष्णतेची लाट कायम राहणार असल्याने नागरिकांनी स्वतःची काळजी घेण्याची गरज आहे. 30 आणि 31 मे दरम्यान जिल्ह्यात वादळी वाऱ्यासह पावसाच्या सरी बरसणार असल्याचा अंदाज हवामान खात्याने व्यक्त केला आहे.