बीड मतदारसंघ : दिवंगत गोपीनाथ मुंडे यांचे जुने कार्यकर्ते प्रचारापासून दूरच

दिवंगत गोपीनाथ मुंडे यांचे जुने कार्यकर्ते भाजपच्या प्रचारापासून दूरच...केवळ आमची हिंदुत्ववादाची भूमिका आहे म्हणून आम्ही भाजप बरोबर आहोत. अन्यथा आम्हाला बीड जिल्ह्यात गोपीनाथ मुंडे यांच्यानंतर सन्मानाची वागणूक मिळाली नाही....जुन्या कार्यकर्त्यांनी व्यक्त केली खंत

बीड- लोकसभा निवडणुकीच्या प्रचाराची रणधुमाळी जोरदार सुरू आहे. त्यातच नाराजी नाट्याचा अंकही सगळ्याच पक्षात रंगताना पाहायला मिळत आहे. त्यामुळे कार्यकर्त्यांची कुंचबना आणि त्यावर प्रतिक्रिया म्हणून पाडापाडीच्या राजकारणाचे डावपेचही सर्वत्र पाहायला मिळत आहेत. तसेच चित्र जिल्ह्यातही पाहायला मिळत आहे. ज्या कार्यकर्त्यांच्या बळावर दिवंगत गोपीनाथ मुंडे यांनी गल्ली ते दिल्ली राजकीय प्रवास केला तेच स्वर्गीय गोपीनाथ मुंडे यांचे जुने व 'थिंक टँक' असलेले कार्यकर्ते भाजपच्या उमेदवार डॉ. प्रीतम मुंडे यांच्या प्रचारापासून दूर असल्याचे चित्र बीड जिल्ह्यात आहे. नाव न छापण्याच्या अटीवर 'ईटीव्ही भारत'शी बोलताना भाजपच्या जुन्या कार्यकर्त्यांनी आपली खंत आणि भावना व्यक्त केली आहे. कार्यकर्ते म्हणातात की, केवळ आमची हिंदुत्ववादाची भूमिका आहे, म्हणून आम्ही भाजपबरोबर आहोत. अन्यथा आम्हाला बीड जिल्ह्यात गोपीनाथ मुंडे यांच्यानंतर सन्मानाची वागणूक मिळाली नाही. भाजपमध्ये मागील काही महिन्यांमध्ये 'आयारामां' ची संख्या वाढली असल्याने गोपीनाथ मुंडे यांचे 'थिंक टँक' प्रचारापासून दूर आहेत.

बीड लोकसभा मतदारसंघात दिवंगत गोपीनाथ मुंडे यांच्या नंतर त्यांच्या वारस त्यांची मुलगी डॉक्टर प्रीतम मुंडे भाजपच्या तिकिटावर बीडमधून लोकसभेची निवडणूक लढवत आहेत. ज्या गोपीनाथ मुंडे यांनी बीड जिल्ह्याच्या जनतेवर सातत्याने स्वतःचा प्रभाव कायम ठेवला. याचे सर्वात महत्त्वाचे कारण म्हणजे दिवंगत गोपीनाथ मुंडे यांचे पक्षाच्या बाहेर जाऊन मित्रत्वाचे संबंध असल्याने गोपीनाथ मुंडे यांच्यासाठी विरोधक देखील आतून मदत करत होते. हे त्यांच्या निवडणुकांचे वैशिष्ट्य असायचे. बीड जिल्ह्यातील सहाही विधानसभा मतदारसंघांमध्ये स्वर्गीय गोपीनाथ मुंडे यांचे समर्थक असायचे. गोपीनाथ मुंडे यांना कुठल्या सभेत कुठल्या तालुक्यात काय बोलायचे याबाबत मार्गदर्शन करत असत. ती टीम 2019 च्या निवडणुकीमध्ये प्रीतम मुंडे यांच्यासाठी काम करत नसल्याचे चित्र बीड जिल्ह्यात पाहायला मिळत आहे. याचा मोठा फटका डॉ. प्रीतम मुंडे यांना बसू शकतो. जुन्या-जाणत्या कार्यकर्त्यांचे 'पॅचअप' करण्याचे मोठे आवाहन मंत्री पंकजा मुंडे यांच्यासमोर आहे.

दोन पर्याय ठरू शकतात डोकेदुःखी-

मंत्री पंकजा मुंडे यांनी जिल्ह्यातील सहाही विधानसभा मतदारसंघात २ पर्याय निर्माण केले आहेत. आष्टीमध्ये आ. भीमराव धोंडे असताना सुरेश धस यांना पक्षात प्रवेश देऊन भाजपकडून आमदार केले. आ. धोंडे यामुळे नाराज आहेत. माजलगावमध्ये आर. टी. देशमुख हे भाजपचे विद्यमान आमदार असतानाच रमेश आडसकर यांना माजलगावमधून आमदारकीचे दिवास्वप्न दाखवले. यात पुन्हा आता मोहनराव जगताप यांना भाजपमध्ये प्रवेश दिला आहे. केज विधानसभा मतदारसंघात आ. संगीता ठोबरे या भाजपच्या विद्यमान आमदार असतानाच तिथे अंजली घाडगे यांना भाजपच्या प्रचारासाठी फिरवले जात आहे. यामुळे भविष्यात केजमध्ये आ. ठोबरे व घाडगे संघर्ष निर्माण होऊ शकतो. अशीच स्थिती बीड विधानसभा मतदारसंघात देखील आहे. भाजपकडून बीडमध्ये रमेश पोकळे हे असतानाच मस्के, क्षीरसागर यांच्याशी पंकजा मुंडे यांची अधिक जवळीकता आहे. गेवराईमध्ये आ. लक्ष्मण पवार यांच्या विरोधात माजी मंत्री बदामराव पंडित यांना पंकजा मुंडे ताकद देत आहेत. या सगळ्या परिस्थितीवरून मंत्री पंकजा मुंडे यांनी बेरजेचे राजकारण केले आहे मात्र, या बेरजेची बीड लोकसभेच्या निवडणुकीत वजाबाकी होऊ नये, याची काळजी बीडच्या भाजप नेतृवाने घेणे आवश्यक असल्याचे मत राजकीय जाणकार व्यक्त करत आहेत.

केवळ पदासाठी नव्हे तर गोपीनाथ मुंडे नावाचा नेत्यावर प्रेम करणाऱ्या कार्यकर्त्यांची यादी फार मोठी आहे. यामध्ये नितीन कोटेचा, फुलचंद कराड , शिवाजी फड श्रीहरी मुंडे, दिनकर गुरुजी, सर्जेराव तांदळे, आदिनाथ नवले, विजय पालसिंगणकर सोमनाथ हलगे, मुरलीधर ढाकणे, पंजाबराव मस्के, बाळासाहेब शिंदे, लालासाहेब घुगे, नवनाथ शिराळे बीडमधील राख कुटुंब केशव आंधळे, दादासाहेब मुंडे, डॉ. प्रकाश आनंदगावकर, सुनील गलांडे अशी अनेक नावे घेता येतील. जे की गोपीनाथ मुंडे यांच्यावर प्रेम करून निवडणुकांमध्ये प्रचाराची धुरा समर्थपणे सांभाळत होते. वरील नावांपैकी काही अपवाद वगळता बहुतांश जण बीड मतदारसंघात भाजपच्या उमेदवार प्रीतम मुंडे यांच्या प्रचारापासून दूर आहेत. याबाबतची खंत स्वतः जुन्या भाजपच्या कार्यकर्त्यांनी खासगीत बोलून दाखवली.