परळीत विनाकारण बाहेर फिरणाऱ्यांना पोलिसांचा दणका, 5 लाखाचा दंड वसूल

परळीत लॉकडाऊनमध्येही विनाकारण बाहेर फिरणाऱ्या, मास्क न वापरणाऱ्यांकडून सुमारे 4 लाख 77 हजार रुपयांचा दंड वसूल करण्यात आला आहे. तर लॉकडाऊनमध्येही दुकाने उघडणाऱ्यांना दंड आकारण्यात आला आहे.

परळी (बीड) - लॉकडाऊनच्या काळात विनाकारण बाहेर फिरणाऱ्यांवर परळी शहरात पोलिसांकडून कारवाई केली जात आहे. परळी शहरातील आझाद चौक, गणपती मंदिर, शिवाजी चौक येथील नाकाबंदी दरम्यान केलेल्या कारवाईत रस्त्यावर फिरणारे वाहन चालक, विना मास्क फिरणारे नागरिक अशा जवळपास 1600 वाहन चालकांवर कारवाई करण्यात आली. त्यांच्याकडून सुमारे 4 लाख 77 हजार रुपये दंडही वसूल करण्यात आला आहे.

दुकानदारांकडून 3 लाखांचा दंड वसूल

लॉकडाऊनमध्येही काही दुकानदारांनी दुकाने उघडली होती. त्यामुळे अशा दुकानदारांकडून नगर पालिकेने 3 लाख 12 हजार रुपये दंड वसूल केला आहे. दुकान उघडे असल्याची माहिती मिळताच परळी शहर पोलिसांचे फिरते पथक तेथे पोहोचते आणि कारवाई करते. या पथकात पोलीस व नगरपालिका कर्मचारी आहेत.

विनाकारण फिरणाऱ्यांची अँटीजेन टेस्ट

तसेच शहरातील रस्त्यांवर विनाकारण फिरणारे, मास्क न वापरणारे नागरिक यांच्या रस्त्यावरच आरोग्य विभागाकडून अँटीजेन टेस्ट करण्यात येत आहेत. यामुळे विनाकारण फिरणाऱ्यांची संख्या कमी झाली आहे. परिणामी रूग्णसंख्याही कमी होत चालल्याचे चित्र आहे.

हेही वाचा -एकाला फसवले, दुसऱ्याला फसवायला निघाली अन् पकडली गेली