बीड- कौटुंबिक वादावरून सासरच्यांनी नवविवाहितेच्या अंगावर रॉकेल ओतून तिला जाळले. ही घटना मंगळवारी रात्री वडवणी तालुक्यातील साळींबा येथे घडली. विवाहितेचा जिल्हा रुग्णालयात उपचारादरम्यान मृत्यू झाला. या घटनेमुळे महिलांवरील अत्याचारांमध्ये दिवसेंदिवस वाढच होत चालल्याचे दिसून येत आहे.
ऋतुजा भास्कर बिटे (वय.१९, रा. साळींबा) असे मृत विवाहितेचे नाव आहे. ८ महिन्यापूर्वी ऋतुजाचा विवाह तिच्या आत्याचा मुलगा भास्कर बिटे याच्याशी झाला होता. लग्नानंतर सतत घरामध्ये कौटुंबिक वाद व्हायचा. यात ऋतुजाला तिच्या सासू व पतीकडून छळले जात होते. मात्र, मंगळवारी दुपारी अडीचच्या सुमारास ऋतुजाच्या सासरच्यांनी तिच्या अंगावर रॉकेल ओतून तिला पेटवले. या घटनेत ती ९९ टक्के भाजली होती. या घटनेनंतर ऋतुजाला रुग्णालयात दाखल करण्यात आले. मात्र, मंगळवारी रात्री उपचारादरम्यान तिचा मृत्यू झाला.