प्रभू वैद्यनाथ कृपेने लवकरच बऱ्या व्हाल…! बहीण प्रीतम मुंडेंसाठी भाऊ धनंजय मुंडेंचा काळजीयुक्त संदेश

बीडमध्ये धनंजय मुंडे आणि मुंडे बहिणींमधला वाद काही जनतेला नवा नाही. या दोन कुटुंबांमधले आरोप-प्रत्यारोप लोकसभा, विधानसभा आणि स्थानिक निवडणुकांमध्ये देखील पाहायला मिळाले आहेत. मात्र, त्यापलीकडे जाऊन या बहीण-भावंडांमध्ये असलेलं नाते देखील काही प्रसंगी समोर येते.

बीड - खासदार प्रीतम मुंडे यांना काही लक्षणे आढळल्यामुळे त्या उपचार घेत असल्याचे समजले. प्रभू वैद्यनाथ कृपेने लवकरच बर्‍या व्हाल ही खात्री आणि सदिच्छा व्यक्त करतो, अशी भावनिक प्रार्थना सामाजिक न्यायमंत्री तथा बीड जिल्ह्याचे पालकमंत्री धनंजय मुंडे यांनी व्यक्त केली. अशा आशयाचे ट्विट मुंडे यांनी आज केले आहे.

धनंजय मुंडे यांनी केलेले ट्विट

बीडच्या खासदार प्रीतम मुंडे यांना कोरोना सदृश्य लक्षण दिसू लागले आहेत. बीड जिल्ह्यात दौरा करून मुंबईला परतल्यानंतर त्यांना सर्दी, खोकला आणि ताप जाणवतोय. याची माहिती झाल्यानंतर त्यांचे बंधु तथा सामाजिक न्यायमंत्री धनंजय मुंडे यांनी आज ट्विट करून काळजी घेण्याचे आवाहन केले. आपल्या ट्विटमध्ये धनंजय मुंडे म्हणतात. बीड जिल्ह्याच्या खा. डॉ. प्रीतमताई मुंडे यांना काही लक्षणे आढळल्याने त्या उपचार घेत असल्याचे समजते. ताई, टेस्ट निगेटिव्ह आली असली तरी डॉक्टरांच्या सल्ल्यानुसार योग्य उपचार व काळजी घ्या, प्रभू वैद्यनाथ कृपेने लवकरच बरे व्हाल ही खात्री आणि सदिच्छा व्यक्त करतो, असे ना. मुंडेंनी म्हटले.