बीड -जिल्ह्यातील सहा विधानसभा मतदारसंघांपैकी केज विधानसभा मतदारसंघात राष्ट्रवादी काँग्रेसला ऐनवेळी सोडचिठ्ठी देऊन मुंदडा कुटुंबाने भाजपमध्ये प्रवेश केला. नमिता मुंदडा यांनी पक्ष बदलून भाजपकडून निवडणूक रिंगणात उडी घेतली आहे. याचा वचपा काढण्यासाठी राष्ट्रवादी काँग्रेसचे पृथ्वीराज साठे यांना उमेदवारी दिली. आता ही दोन दिग्गज कुटुंबातील लढत प्रतिष्ठेची झाली आहे.
केज विधानसभा मतदारसंघात राष्ट्रवादी काँग्रेसचे पृथ्वीराज साठे आणि भाजपच्या नमिता मुंदडा या दोघांमध्ये कोण बाजी मारणार याकडे सर्वांचे लक्ष लागले आहे. पंकजा मुंडे यांनी पुढाकार घेऊन मुंदडा कुटुंबीयांना भाजपमध्ये घेतले आणि उमेदवारी दिली, अशी चर्चा आहे. केज विधानसभा मतदारसंघातून उमेदवारीसाठी स्वतः शरद पवार यांनी नमिता मुंदडा यांचे नाव जाहीर केले होते. मुंदडा कुटुंबीयांनी केलेल्या बंडखोरीनंतर राष्ट्रवादी काँग्रेसने पृथ्वीराज साठे यांना विधानसभा मतदारसंघातून उमेदवारी दिली.