बीड -कोरोनाच्या पार्श्वभूमीवर सर्वत्र लॉकडाऊन आहे. बाजारपेठा बंद आहेत. काही तासांसाठी फळविक्री करण्याची परवानगी आहे. मात्र, यादरम्यान फळ, भाज्या कवडीमोल भावाने विकाव्या लागत असल्याची वेळ शेतकऱ्यांवर आली आहे.
नंदागौळ येथील शेतकरी नागराज गित्ते यांनी पारंपरिक पद्धतीने शेती करत असताना दोन एकर शेतात खरबूज पीकांची लागवड केली. त्यासाठी खर्च केला. पाणी उपलब्ध असल्याने खरबूज पीकही जोमात आले आहे. पंरतु, बाजारपेठ उपलब्ध नसल्याने मोठ्या प्रमाणात हाल होत आहेत. कोरोनाच्या संकटामुळे भाव नाही. त्यामुळे बाजारपेठेत कवडीमोल भावाने विक्री होत आहे, ते परवडणारे नाही. त्यामुळे मेहनतीने पिकवलेल्या खरबूज पिकावर नांगर फिरवण्याची वेळ गित्ते यांच्यावर आली आहे.
ठिंबक, मल्चिंग, औषध फवारणी, मजुरांचा पगार, असा खर्च एकूण एकरी एक ते दोन लाख रुपये केला आहे. मात्र, बाजारभाव नसल्याने ते आर्थिक संकटात सापडले आहेत. त्यामुळे शासनाने पंचनामे करत नुकसान भरपाई द्यावी, अशी मागणी त्यांनी केली आहे.