विशेष: दिव्यांग असतानाही केवळ इच्छाशक्तीच्या जोरावर सर केला लोहगड

केवळ इच्छाशक्तीच्या जोरावर दहा दिव्यांग नागरीकांनी तीन हजार फूट उंचीचा लोहगड (जिल्हा पुणे) सव्वा दोन तासात सर केला.

बीड- मनामध्ये आत्मविश्वास असला की, कोणतीच गोष्ट अशक्य नसते. केवळ इच्छाशक्तीच्या जोरावर दहा दिव्यांग नागरीकांनी तीन हजार फूट उंचीचा लोहगड (जिल्हा पुणे) सव्वा दोन तासात सर केला. दिव्यांग असलेल्या नागरिकांसाठी ही प्रेरणादायी बाब असून याबाबत ईटीव्ही भारताने घेतलेला हा आढावा...

लोहगडची भूमी आम्हाला सतत प्रेरणा देते-

3420 फूट उंचीचा लोहगड केवळ सव्वा दोन तासात या दिव्यांग नागरिकांनी सर करून दाखवला आहे. या दिव्यांग नागरिकांमध्ये कोणी पायाने दिव्यांग आहे तर कोणी अंध आहे. शारीरिक व्यंग असताना देखील गड किल्ले चढण्याची क्षमता असलेले व शिवऊर्जा प्रतिष्ठानचे सदस्य असलेले बीड येथील शिक्षक कचरू चांभारे यांच्याशी ईटीव्ही भारत'ने संवाद साधला असता ते म्हणाले की, शिव ऊर्जा प्रतिष्ठानच्या माध्यमातून राज्यभरातील आम्ही दिव्यांग नागरिक एकत्र आलो आहोत. औरंगाबाद येथील शिवाजी गाडे यांच्या पुढाकारातून शिव ऊर्जा प्रतिष्ठानच्या माध्यमातून आम्ही आजपर्यंत अनेक गड-किल्ले सर केलेले आहेत. आम्ही पुणे जिल्ह्यातील लोहगड सर करण्याअगोदर एकत्रित नियोजन केले होते. यापूर्वी कळसुबाई शिखर चढण्याचा आम्हाला अनुभव होता. त्या अनुभवाच्या जोरावरच 31 जानेवारी रोजी आम्ही आमची मोहीम लोहगडकडे वळवली होती. सुरुवातीला आम्ही मनाचा निश्चय केला. लोहगड चढायला सुरुवात केली. छत्रपती शिवाजी महाराजांच्या पावन स्पर्शाने पुनित झालेली लोहगडची भूमी आम्हाला सतत प्रेरणा देते. या प्रेरणेतूनच आमच्यामध्ये व्यंगत्व असताना देखील आम्ही लोहगड सर केला, असे दिव्यांग शिक्षक कचरू चांभारे म्हणाले.

आम्ही इतरांपेक्षा कमी नाहीत-

मागील वर्षभरामध्ये आम्ही दिव्यांग नागरिकांनी एकत्र येत कळसुबाईच्या शिखरासह तीन ते चार गड किल्ले सर केले. यामुळे आमचा आत्मविश्वास वाढला असून आम्ही दिव्यांग असलो तरी इतरांपेक्षा कमी नाही, याची जाणीव मनामध्ये निर्माण झाली आहे. त्यामुळे आम्हाला याचा अभिमान वाटतो असेही शिव उर्जा प्रतिष्ठानच्या दिव्यांग नागरिकांनी यावेळी सांगितले.

भविष्यात सागर किनारी असलेले पाच किल्ले करणार सर-

शिवाय ऊर्जा प्रतिष्ठानच्या माध्यमातून दिव्यांग असताना देखील गड-किल्ले चढण्याचे सामर्थ्य हे नागरीक दाखवतात. तसेच छत्रपती शिवाजी महाराजांच्या जयंती दिवशी म्हणजेच 19 फेब्रुवारी 2021 रोजी महाराष्ट्रातील सागरी किनाऱ्यावर असलेले पाच किल्ले सर करायचे असल्याचे स्वप्न या दिव्यांग नागरिकांनी उराशी बाळगले आहे. या मोहिमेसाठी ते लवकरच तयारी करणार असल्याचे देखील कचरू चांभारे म्हणाले.

गड सर करणाऱ्यांमध्ये यांचा होता समावेश-

31 जानेवारी 2021 रोजी ज्या दिव्यांग नागरिकांनी लोह गड सर केला. त्यामध्ये शिवाजी गाडे, कचरू चांभारे, प्रा. गोंडे, धर्मेंद्र सातव, सागर बोडके, जगन्नाथ चौरे, बाबर, घुमरे आदींचा समावेश होता.

हेही वाचा-मोदींशी दोन हात करणारे नाना पटोले होणार काँग्रेस प्रदेशाध्यक्ष; अशी आहे कारकीर्द