वृंदावनमध्ये अडकले परळीमधील 90 भाविक; नातेवाईकांची मुख्यमंत्र्यांकडे धाव

देशात 22 मार्चला जनता कर्फ्यू व त्यानंतर लॉकडाऊन केल्याने 22 मार्चपासून रेल्वे गाड्या रद्द झाल्या आहेत. यामुळे या 90 जणांना परळीकडे येता येत नाही, त्यामुळे 25 मार्चपासून त्यांचे जेवणाचे हाल सुरू झाले आहेत. कसेही करून आम्हाला परळी कडे येऊ द्या, अशी विनवणी वृंदावन येथे आश्रमात मुक्कामाला थांबलेले परळी व अन्य ठिकाणचे लोक करून लागले आहेत.

बीड - देशात 'लॉकडाऊन' केल्यामुळे तीर्थयात्रा व भागवत कथेला गेलेले बीडच्या परळी शहरातील 90 महिला-पुरुष भाविक वृंदावन (उत्तर प्रदेश) येथे अडकले आहेत. रेल्वे रद्द झाल्याने या भाविकांवर मथुरा वृंदावनमध्येच धर्मशाळेत अडकून पडण्याची वेळ आली आहे. बीड जिल्ह्यातील परळी येथील त्या भाविकांच्या नातेवाईकांनी मुख्यमंत्री उद्धव ठाकरे यांच्याकडे पत्रव्यवहार करून आमच्या नातेवाईकांना परत परळीत आणण्याबाबत विनंती केली आहे.

देशात 22 मार्चला जनता कर्फ्यू व त्यानंतर लॉक डाऊन केल्याने 22 मार्चपासून रेल्वे गाड्या रद्द झाल्या आहेत. यामुळे या 90 जणांना परळीकडे येता येत नाही, त्यामुळे 25 मार्चपासून त्यांचे जेवणाचे हाल सुरू झाले आहेत. कसेही करून आम्हाला परळी कडे येऊ द्या, अशी विनवणी वृंदावन येथे आश्रमात मुक्कामाला थांबलेले परळी व अन्य ठिकाणचे लोक करून लागले आहेत.

शाम महाराज उखळीकर यांच्या भागवत कथेला परळी शहरातील श्री संत सावता माळी नगर, कृष्णा नगर, सिद्धेश्वरनगर, किर्ती नगर, देशमुख गल्ली येथील 80 जण तसेच पानगाव, परभणी व पंढरपूर येथील भाविक गेले होते. 16 मार्च रोजी परभणी येथून सचखंड एक्सप्रेस रेल्वेने वृंदावन येथे आयोजित केलेली भागवत कथा श्रवण कार्यक्रम आटोपून त्यांनी 22 मार्चला रेल्वेचे आरक्षण केले होते. पण जनता कर्फ्यू, लॉक डाऊनमुळे रेल्वे बंद केल्याने या सर्वांना परळी येथे येण्याची कुठलीही सुविधा नाही पर्यायाने त्यांना आश्रमामध्ये मुक्काम करावा लागत आहे.

आम्हाला परळीकडे यायचे आहे, कसेही करून तिकडे घेऊन जा, अशी विनवणी मुख्यमंत्र्यांकडे केली आहे. कोरोना संदर्भाने आणीबाणीच्या परिस्थितीमुळे अडचणी येत असल्याचे सांगितले जात आहे.