बीड-मागील चार दिवसांपासून परतीच्या पावसाने बीड जिल्ह्यात थैमान घातले आहे. जिल्ह्यातील अनेक गावांमध्ये कायम दुष्काळी परिस्थिती असते. मात्र, यंदा समाधानकारक पाणीसाठा झाला आहे. यामध्ये आष्टी तालुक्यातील बेलगावचा तलाव गेल्या पाच वर्षात पहिल्यांदाच ओव्हरफ्लो झाला आहे. आजघडीला जिल्ह्यातील मोठे व मध्यम प्रकल्पांमध्ये ८३ टक्के पाणीसाठा जमा झाले आहे, अशी माहिती लाभक्षेत्र विकास प्राधिकरणाच्या साप्ताहिक अहवालात देण्यात आली.
माहिती देताना महिला शेतकरी सुरेखा पोकळे
राज्यभरात सध्या परतीच्या पावसाने जोर धरला आहे. पावसाने बीड जिल्ह्याला देखील झोडपले असून, जिल्ह्यातील सर्वच लहान मोठी धरणे ओव्हरफ्लो झाली आहेत. जिल्ह्यात लघू व मध्यम प्रकल्पांची संख्या ही १४४ एवढी आहे. यामध्ये माजलगाव प्रकल्प १०० टक्के भरला असून, मांजरा प्रकल्प ७७ टक्के भरला आहे.