औरंगाबाद - शिवसेनेचे राजेंद्र जंजाळ यांची महानगर पालिकेच्या उपमहापौरपदी निवड करण्यात आली. राज्यात महाविकास आघाडीचा फॉर्म्युला औरंगाबाद महानगरपालिकेत पाहायला मिळाला. काँग्रेस आणि राष्ट्रवादीच्या मतांवर 30 वर्षांत पहिल्यांदा शिवसेनेने भाजपला सोडून पालिकेत सत्ता मिळवली.
शिवसेनेचे राजेंद्र जंजाळ यांना 51 मते, भाजप पुरस्कृत गोकुळ मलखे यांना 34 मते, एमआयएमचे जफर बिल्डर यांना 13 मते मिळाली तर दोन जण तटस्थ राहिले. काँग्रेसचे आणि राष्ट्रवादीचे मत मिळाल्याने शिवसेनेला महापौर पदासह उपमहापौर पदावर देखील विजय मिळवणे सोपे झाले.
शहराच्या पाणी योजनेच्या मुद्द्यावरून भाजपचे नगरसेवक विजय औताडे यांनी उपमहापौर पदाचा राजीनामा दिला होता. राज्य सरकार शहराच्या विकास कामांमध्ये खोडा घालत असल्याचा आरोप भाजपने करत पाणी योजना सुरू होत नाही, तोपर्यंत महानगर पालिकेत शिवसेना विरोधी भूमिका घेतल्याचे भाजपने जाहीर केले. भाजपच्या निर्णयाने काँग्रेस पक्षाला सत्तेत स्थान मिळेल, अशी आशा होती. त्यानुसार स्थानिक नेत्यांनी तसा प्रस्ताव पक्षश्रेष्ठींकडे पाठवला होता. आघाडीबाबत निर्णय वेळेवर झाला नसल्याने शिवसेनेकडून राजेंद्र जंजाळ आणि काँग्रेसतर्फे अफसर खान यांनी उपमहापौर पदासाठी अर्ज सादर केले. मात्र, ऐनवेळी काँग्रेसच्या अफसर खान यांनी आपला अर्ज मागे घेतला.