रेल्वेची वेबसाईट हॅक करून तिकीटांचा काळाबाजार; एकाला अटक

रेल्वेची वेबसाईट हॅक करून रेल्वेच्या 'तत्काळ' तिकीटांचे काही मिनिटांत बुकिंग करण्याचे रॅकेट दुबईतील हमीद अशरफ चालवत होता. बेवसाईट हॅक करून जनरेट झालेली लिंक हमीद दुबईतून भारतातील त्याच्या संपर्कातील लोकांना पाठवत असे. यामध्ये सोहेल अहमद याचा समावेश आहे.

औरंगाबाद - रेल्वेची वेबसाईट हॅक करून 'तत्काळ' तिकीटांचा काळाबाजार केल्याप्रकरणी औरंगाबादच्या बुढ्ढीलेन भागातून एकाला अटक करण्यात आली. सोहेल अहमद असे त्याचे नाव असून तो मूळचा उत्तर प्रदेशाच्या गौडा येथील रहिवासी आहे. दुबईतून रेल्वेची वेबसाईट हॅक करणाऱ्या हमीद अशरफ याच्या तो संपर्कात होता.

अटक केलेला सोहेल सहा वर्षांपासून औरंगाबाद येथे वास्तव्यास आहे. बुढ्ढीलेन भागात तो कपडे शिवण्याचा व्यवसाय करत होता. रेल्वेची वेबसाईट हॅक करून रेल्वेच्या 'तत्काळ' तिकीटांचे काही मिनिटांत बुकिंग करण्याचे रॅकेट दुबईतील हमीद अशरफ चालवत होता. वेबसाईट हॅक करून जनरेट झालेली लिंक हमीद दुबईतून भारतातील त्याच्या संपर्कातील लोकांना पाठवत असे. काही दिवसांपूर्वी दुबई पोलिसांच्या मदतीने हमीद अशरफ याची चौकशी करण्यात आली.

हेही वाचा - 'स्विगी'चा 'डिलिव्हरी ब‍ाॅय' निघाला चोरटा; साताऱ्यातील ४० घरफोड्यांची कबुली

चौकशी दरम्यान हमीदकडे भारतातील 93 लोकांचे मोबाईल क्रमांक सापडले, त्यात सोहेल अहमद याचाही समावेश आहे. सोहेल अहमदकडे तीस मोबाईल सीमकार्ड सापडले आहेत. दुबईतील हमीदच्या सहाय्याने भारतात हे रेल्वे तिकीटांचे रॅकेट चालवणाऱ्या टोळीच्या म्होरक्याला आसामच्या गुवाहटीमधून ताब्यात घेण्यात आले. त्यानंतर शुक्रवारी मध्यरात्रीपासून देशभरात आठ ठिकाणी धाडी टाकण्यात आल्या. याच मोहिमेअंतर्गत औरंगाबादमधून सोहेल अहमदला अटक केले आहे.

या सर्व प्रकरणाचा कर्ता-धर्ता असलेल्या हमीद अशरफ याला यापूर्वी देखील अशाच गुन्ह्यांमध्ये रेल्वे पोलिसांनी अटक केली होती. मात्र, या प्रकरणातून सुटका झाल्यानंतर त्याने दुबई येथे पलायन केले. तेथे गेल्यानंतर त्याने पुन्हा रेल्वेची वेबसाईट हॅक करायला सुरुवात केली. रेल्वेच्या तत्काळ कोट्यातील तिकिटे बुकिंग करण्याचे रॅकेट त्याने सुरू केले.

भारतात हे रॅकेट चालवणाऱ्या टोळीच्या म्होरक्याने रेल्वे सुरक्षा दलाच्या महासंचालकांना टेक्स्ट मेसेज केला होता. 'माझ्यावर तुम्ही कारवाई केली तर माझे लग्न कसे होईल, त्यापेक्षा रेल्वेची वेबसाईट हॅकच होणार नाही, अशी व्यवस्था तुम्ही करायला हवी', असे या टेक्स्ट मॅसेजमध्ये म्हटले होते. त्यानंतर रेल्वे सुरक्षा दलाने या प्रकरणाचा तपास हाती घेतला होता. औरंगाबादचे आणखी किती लोक अटक केलेल्या सोहेल अहमदच्या संपर्कात होते. सोहेलने ही लिंक आणखी किती लोकांना पुरवली, याचा पोलीस तपास करत आहेत.