औरंगाबाद- भाजप आणि नितीशकुमार यांचा बिहार निवडणुकीत पराभव झाला असल्याचे मी मानतो. लालू प्रसाद यादव यांच्या मुलाने कुठलीही साधने नसताना दिलेली झुंज कौतुकास्पद आहे. भाजपने हा विजय न समजता त्यातून बोध घेतला पाहिजे, असा टोला राष्ट्रवादी काँग्रेस प्रदेशाध्यक्ष जयंत पाटील यांनी भाजपला लगावला.
भाजपत लवकरच गळती
बिहार निवडणुकीनंतर महाराष्ट्रात लवकरच सत्ता परिवर्तन होईल, असे भाजप म्हणत आहे. मात्र, तसे होणार नाही. देवेंद्र फडणवीस काहीही म्हणू द्या, आम्ही आमचा कार्यकाळ पूर्ण करणार, उलट भाजपतच लवकरच गळती लागणार आहे. त्यानंतर फडणवीस असे बोलणार नाहीत, अशी टीका जयंत पाटील यांनी केली.
महाविकास आघाडीतील बंडखोर उमेदवारी मागे घेतील
महाविकास आघाडीतर्फे मराठवाडा पदवीधर मतदारसंघात सतीश चव्हाण यांना उमेदवारी दिल्याने. काही बंडखोरांनी भरलेले अर्ज मागे घेतले जातील. तशी बोलणी सुरू आहे. त्यात कोणतीही अडचण येणार नाही, असे वक्तव्य करत बच्चू कडू यांच्या प्रहारच्या वतीने दिली गेलेली उमेदवारी मागे घेतली जाईल, असे संकेत जयंत पाटील यांनी दिले.