जयंत पाटील यांच्या कार्यक्रमात मराठा क्रांती मोर्चाच्या कार्यकर्त्यांची घोषणाबाजी

मराठा समाजाच्या मागण्या मान्य करून चालु अर्थ संकल्पामध्ये मराठा समाजासाठी आवश्यक ती आर्थिक तरतूद करण्याच्या मागणीसाठी जयंत पाटील यांच्या सभेत मराठा क्रांती मोर्चाच्या समन्वयकांच्यावतीने जाब विचारण्यात आला.

औरंगाबाद -राज्याचे जलसंपदा मंत्री आणि राष्ट्रवादी काँग्रेसचे प्रदेशाध्यक्ष जयंत पाटील यांच्या उपस्थितीत राष्ट्रवादी भवन येथे कार्यकर्ता मेळावा घेण्यात आला. या मेळाव्या दरम्यान जयंत पाटील कार्यकर्त्यांना मार्गदर्शन करत असताना मराठा मोर्चाच्या कार्यकर्त्यांनी घोषणाबाजी करत गोंधळ घातला.

मराठा समाजाच्या मागण्या मान्य करून चालु अर्थ संकल्पामध्ये मराठा समाजासाठी आवश्यक ती आर्थिक तरतूद करण्याच्या मागणीसाठी जयंत पाटील यांच्या सभेत मराठा क्रांती मोर्चाच्या समन्वयकांच्यावतीने जाब विचारण्यात आला. महाआघाडी सरकारने यानंतर जर मराठा समाजाच्या मागण्यांकडे दुर्लक्ष केले तर, येणाऱ्या काळात राज्यभर तीव्र स्वरुपाचे आंदोलन करण्याचा इशारा देण्यात आला. मराठा समाजाला गृहित धरुन यापुढे कोणालाही राजकारण करु देणार नसल्याचेही मराठा क्रांतीमोर्चाच्या कार्यकर्ते म्हणाले. यावर प्रतिक्रिया देताना मराठा क्रांती मोर्चाच्या कार्यकर्त्यांनी गोंधळ नाही घातला तर ते मला भेटायला आले होते, असे जयंत पाटील म्हणाले. आमची मराठा समाजाच्या आंदोलकांसोबत चर्चा सुरु असून लवकरच त्यावर तोडगा निघेल, असे पाटील म्हणाले.

हेही वाचा -VIDEO : औरंगाबादमध्ये भरधाव कारने 3 जणांना उडवले, दोघांचा मृत्यू

औरंगाबाद महापालिका निवडणूक एकत्र लढण्याबाबत महाविकास आघाडीमध्ये चर्चा सुरु असून लवकरच याबाबत निर्णय घेण्यात येईल, असेही पाटील म्हणाले. कृष्णा मराठवाडा बोगद्याच्या काम सुरू असून 850 कोटींमध्ये बोगद्याच्या काम होणार आहे. कृष्णा खोऱ्यातील पाणी आणून मराठावाड्याला पाणी द्यायचे आहे. यावर्षीपर्यंत या बोगद्याचे काम पूर्ण होईल. यातून मराठवाड्याला 7 टीएमसी पाणी मिळमार असल्याचेही पाटील यांनी सांगितले. मुख्यमंत्री उद्धव ठाकरे यांच्या अयोध्या दौऱ्यावर बोलताना आमचे लोक गेले का हे माहीत नाही. रामाच्या दर्शनाला त्यांनी जावे. राम हा राजकारणाचा नाही तर श्रद्देचा विषय आहे, असे मत पाटील यांनी व्यक्त केले.

औरंगाबाद शहरचे नाव बदलणार का यावर बोलताना पाटील यांनी सावध भूमिका घेत जर-तर वर मी बोलणार नाही. विमानतळाते नाव बदलले आहे. लोक त्याचे स्वागत करतील, असे उत्तर त्यांनी दिले.