Mangesh Sable On Gunaratna Sadavarte :..अन्यथा ॲड. गुणरत्न सदावर्तेंना गंभीर परिणाम भोगावे लागतील; मंगेश साबळेंचा इशारा

Mangesh Sable On Gunaratna Sadavarte : ॲड. गुणरत्न सदावर्ते यांच्या मराठा विरोधी वक्तव्यामुळं त्यांची गाडी फोडल्याची प्रतिक्रिया संरपंच मंगेश साबळे यांनी दिली आहे. यानंतर देखील त्यांनी असं वक्तव्य केल्यास त्यांना गंभीर परिणाम भोगावे लागतील असा इशारा मंगेश साबळे यांनी दिला आहे.

छत्रपती संभाजीनगरMangesh Sable On Gunaratna Sadavarte :ॲड. गुणरत्न सदावर्ते यांनी मराठा समाजाबद्दल चुकीचं वक्तव्य केल्यास, त्याचे गंभीर परिणाम त्यांना भोगावे लागतील, असा इशारा मराठा आंदोलक मंगेश साबळे यांनी दिला. मराठा तरुण आत्महत्या करत आहेत, तर ॲड. सदावर्ते मराठा समाजाच्या भावना दुखावत आहेत, मराठा समाजाला माजोरडे म्हणत आहे, मराठा समाजाला आरक्षण मिळून देणार नाही, असं म्हणत आहेत. आज आमच्या समाजाचे मुडदे पडत आहेत. त्यामुळं त्याची गाडी फोडली. त्यांनी मराठा समाजाबद्दल अशी वक्तव्यं न थांबवल्यास वाईट परिणाम सदावर्तेंना भोगावे लागतील, असा इशारा मंगेश साबळे यांनी दिला आहे.

...म्हणून आमचा रोष :मराठा आरक्षणाच्या मागणीसाठी मनोज जरांगे यांनी आंदोलन सुरू केलंय. त्यांनी सरकारला चाळीस दिवसांचा वेळ दिला होता. मात्र, तो वेळ संपला असून शासनावर आम्हाला भरोसा राहिलेला नाहीये. शांततेत आंदोलन सुरू असताना सदावर्ते समाजाला मुद्दाम राग आणण्याचं काम करत आहेत. शांततेच्या आंदोलनाला हिंसक वळण लागू नये, म्हणून आमचा रोष व्यक्त केला. जरांगे पाटील यांचं आंदोलन सुरू आहे, ते सुरूच राहील. जरांगे पाटील यांच्या जिवाला काही होऊ नये, असं वाटतं. मराठा समाज आरक्षण घेतल्याशिवाय शांत बसणार नाही, असा इशारा मंगेश साबळे यांनी दिला.

स्वतःची गाडी जाळली म्हणून त्यांची फोडली :मराठा समाजावर झालेल्या लाठीमारनंतर आमच्या आई बहिणींचं रक्त सांडलं. आमच्या समाजाच्या नेत्यांकडं महागड्या गाड्या आहेत. त्यांनी कुठलीच भूमिका घेतली नाही. जे लोकप्रतिनिधी निवडून दिले, ते नेते पैसे कमावून बसले आहेत. त्यांच्याकडे पाच-दहा गाड्या आहेत. त्यातली त्यांनी एखादी गाडी जाळून दाखवली नाही. त्यामुळं माझ्यासारख्या सरपंचाला एक गाडी जाळावी लागली. आंतरवाली सराटीमध्ये रक्तपातची घटना घडली, त्याचा निषेध म्हणून मी गाडी जाळली. समाजाबद्दल अपशब्द वापरला म्हणून, सदावर्तेंची गाडी फोडली असं मत मंगेश साबळे यांनी व्यक्त केलं.

सदावर्तेंवर गुन्हा दखल करावा :मुंबईत ॲड. सदावर्ते यांनी मराठा आंदोलक मनोज जरांगे यांच्यावर गुन्हा दखल करण्याची मागणी केली. त्यावर बोलताना साबळे म्हणाले, जो माणूस शांततेत उपोषण करतोय त्याच्यावर गुन्हा दाखल करा, असं म्हणणारे वकील आहे की कोण? त्यांना बुद्धी आहे की नाही? त्यांची क्षमता तपासावी, त्यांच्यावर गुन्हा दाखल झाला पाहिजे, अशी मागणी साबळे यांनी केलीय. मराठा समाजाच्या बांधवांनी आत्महत्या करू नये, अशी माझी विनंती आहे. संघर्ष करून मरा, आत्महत्या करून कोणीही टोकाचं पाऊल उचलू नये. मराठा समाज आरक्षण घेतल्याशिवाय राहणार नाही. मी जोपर्यंत आहे तोपर्यंत आरक्षण मिळणार नाही, या वक्तव्यामुळेच सदावर्ते यांची गाडी फोडली. यानंतर सदावर्ते यांनी मराठा समाजाची अस्मिता दुखावणारं वक्तव्य करू नये. नाहीतर त्याचे परिणाम वाईट होतील, असा इशारा मंगेश साबळे यांनी दिला.

पुढील भूमिका लवकरच जाहीर करणार :गेल्या काही दिवसांमध्ये मराठा युवक आत्महत्या करण्याचं पाऊल उचलत आहे. शांततेत सुरू असलेल्या आंदोलनाची दिशा बदलू नये, यासाठी आत्महत्या करणाऱ्या तरुणांना आत्मविश्वास यावा, मराठा जागा व्हावा, त्यासाठी ही कृती केली. दुसऱ्या बाजूनं आम्ही देखील हा लढा सुरू ठेवत आहोत. आगामी काळात लोकसभेच्या आचारसंहिते अगोदर मराठा समाजाला आरक्षण द्यावं. अन्यथा निवडणुकीच्या काळात कुणाच्याही सभा होऊ देणार नाही, एकही मंत्री, एकही नेता गावात फिरू देणार नाही. शासनानं आरक्षण दिलं नाही, तर उद्याच्या पत्रकार परिषदेत सर्व मराठा क्रांती मोर्चा समन्वयकांशी चर्चा करून आमचा निर्णय आम्ही सांगणार आहोत, असं मंगेश साबळे यांनी सांगितलं.

हेही वाचा -