औरंगाबाद - आंब्याच्या ठेकेदाराला तलवारीचा धाक दाखवत आंबे घेऊन जाणाऱ्या व्यक्तीला अटक केल्याची घटना समोर आली आहे. ही घटना येथील हिमायतबागमधील अमराईत घडली. या व्यक्तीविरोधात बेगमपुरा पोलीस ठाण्यात गुन्हा दाखल करण्यात आला असून, त्याला गुन्हे शाखेने अटक केली आहे. प्रवीण मधुकर सोळसे (वय २७, रा. भिमराज नगर, हिमायतबाग) असे अटक केलेल्या व्यक्तीचे नाव आहे.
विनोद ज्योतिष कुंडारे यांनी हिमायतबाग येथील अमराईचा ठेका घेतलेला आहे. दरम्यान, आरोपी प्रवीण सोळसे आमराईत आंबे तोडत होता. त्याला आंबे तोडताना पाहून ठेकेदार कुंडारे यांनी त्याला थांबवण्याचा प्रयत्न केला. यावेळी त्याने आंबे तोडणे थांबवले नाही. त्यावेळी त्याची आणि ठेकेदार कुंडारे यांची शाब्दिक बाचाबाची झाली. त्यानंतर प्रवीण सोळसे घरी गेला आणि तलवार घेऊन आला. नंतर तो ठकेदाराला तलवारीचा धाक दाखवून आंबे घरी घेऊन गेला. याबाबत ठेकेदाराने बेगमपुरा पोलीस स्टेशनमध्ये तक्रार दाखल केली होती. याप्रकरणी गुन्हे शाखेच्या पथकाने आरोपी प्रवीण सोळसेच्या घराची झाडाझडती घेतली. त्याच्याकडे तलवार सापडली. ती तलवार जप्त करून पोलिसांनी त्याला अटक केली.