औरंगाबाद : कोरोनाचा प्रादुर्भाव कमी होताच महानगरपालिकेने अतिरिक्त झालेल्या कंत्राटी आरोग्य कर्मचाऱ्यांना कामावरून कमी केले. या निर्णयाच्या विरोधात कर्मचाऱ्यांनी गुरुवारी (2 सप्टेंबर) सायंकाळी पालिकेच्या आवारात आंदोलन केले. यावेळी कामगार परत घेण्याची मागणी करण्यात आली.
औरंगाबादमध्ये कोरोना योद्ध्यांचे आंदोलन
350 कंत्राटी कर्मचाऱ्यांची कपात
महानगरपालिकेने आरोग्य विभागातील 350 कंत्राटी कर्मचाऱ्यांचे काम थांबवण्याचे आदेश दिले आहेत. कोविड काळात आरोग्य सेवा देण्यासाठी आरोग्य सेवकांची कंत्राटी भरती करण्यात आली होती. मात्र कोरोना आटोक्यात येत असल्याने कोविड सेंटर बंद करण्यात आले. तर अतिरिक्त असलेल्या 350 आरोग्य सेवकांचे काम थांबवण्यात आले आहे. त्यापैकी काही कर्मचाऱ्यांची सेवा सुरू ठेवण्याचे आदेश देण्यात आले असले तरी अचानक कामावरून कमी केल्याने आरोग्य कर्मचारी संतप्त झाले आहेत.