औरंगाबाद- सख्ख्या बहिणीचे दागिने चोरणाऱ्या भावाला एमआयडीसी वाळूज पोलिसांनी ताब्यात घेतले आहे. त्याने चोरलेले दागिनेही पुण्यात राहणाऱ्या त्याच्या मित्राच्या घरातून जप्त केले आहे.
भावानेच केले बहिणीच्या घरी 'हात साफ'
जोगेश्वरी येथे राहणाऱ्या समशेरखान मैनुद्दीनखान यांच्या घरात त्यांचा मेव्हणा नरूल हसन मुस्तफाखान (वय 23 वर्षे) हा गेल्या सहा ते सात वर्षांपासून राहतो. समशेरखान मैनुद्दीनखान यांच्या पत्नीने त्यांचा जवळील साडेसत्तावीस ग्रॅमचा सोन्याचा हार, पावणे नऊ ग्रॅमचे झुमके तसेच पाच ग्रॅम वजनाची अंगठी एका डब्यात भरून तो डबा कपाटामध्ये ठेवला होता. हे नरूल हसन याला माहीत असल्याने त्याने 25 जानेवारी रोजी संधी साधून कपाटातील दागिने चोरले. त्यानंतर ते दागिने आईचे असल्याचे सांगून ते पुण्यात राहणाऱ्या मित्रांकडे नरूलने ठेवले होते, असे पोलिसांनी सांगितले.