औरंगाबाद -पोलिसांबद्दल समाजात चांगली प्रतिमा नाही असे काही प्रमाणात दिसते. मात्र, येथे पोलिसांचे वेगळे रुप पाहायला मिळाले आहे. हत्या झालेल्या महिलेच्या मुलांना आधार देऊन पोलिसांनी समाजासमोर एक वेगळाच आदर्श प्रस्थापित केला आहे.
वर्दीतल्या माणसांमुळे चार अनाथांना मिळाला आधार चिखलठाणा ग्रामीण पोलीस स्टेशन हद्दीत एका महिलेची हत्या करण्यात आली होती. या महिलेला 2 मुली आणि 2 मुले आहेत. मुलींचे वय 13 आणि 11 तर मुलांचे वय 9 आणि 4 आहे. आईचा मृत्यू झाल्याने त्यांचा आधारच हरवला होता. 2 वेळच्या जेवणाची भ्रांत असलेली मुले कुठे जातील? या मुलांचे काय करावे, असा प्रश्न पडला होता. यानंतर पोनि महेश आंधळे यांनी तातडीने पोलीस अधीक्षक मोक्षदा पाटील यांच्याशी चर्चा केली.
चर्चेनंतर सातारा परिसरातील भगवान बाबा पालिका आश्रमाच्या संचालिका कविता वाघ यांच्याशी संपर्क करण्यात आला आणि त्यांनाही या प्रकाराची माहिती देण्यात आली. यानंतर यातील 2 मुली आणि एका मुलाला सातारा परिसरातील भगवान बाबा पालिका आश्रमात दाखल करण्यात आले आहे. तर सर्वात लहान मुलाला भारतीय समाज सेवा केंद्रात भरती करण्यात आले आहे. पोलीस अधीक्षक मोक्षदा पाटील आणि महेश आंधळे यांनी या मुलांची जबाबदारी स्विकारल्याने पोलीस विभागाचे कौतुक केले जाते आहे.
हेही वाचा -प्रियकराच्या मदतीने वडिलांचा खून, सुटकेसमध्ये आढळले होते अवयव
दोन्ही बहिणी प्रचंड हुशार -
आश्रमात दाखल करण्यात आलेल्या दोन्ही मुली आणि एक मुलगा चांगलेच चर्चेत आल्या आहेत. या दोन्ही बहिणी प्रचंड हुशार आहेत. कुठलं प्रशिक्षण न घेता एक खेळात तर दुसरी नृत्यात पारंगत आहे. एवढेच नाही तर मोठी मुलगी खेळात आणि लहान मुलगी नृत्यात चांगली कामगिरी करू शकतात असा विश्वास बालिका आश्रमाच्या संचालिका कविता वाघ यांनी व्यक्त केला आहे.
हेही वाचा -कांदा पिकावर करपा रोगाचा प्रादुर्भाव; चांगले दर मिळत असताना शेतकऱ्यांच्या चिंतेत वाढ
अशी झाली होती हत्या -
पाच महिन्यांपूर्वी यांची आई रोजप्रमाणे कामाला गेली. रात्र झाली तरी आई न आल्याने मोठ्या बहिणीने लहान भावंडांना घेत शोध घेतला. मात्र, त्या कुठेही मिळाल्या नाहीत. यानंतर 2 दिवसांनी अचानक पोलीस आले आणि एका नराधमांने त्यांच्या आईची क्रूर हत्या केल्याची माहिती दिली. एका प्रियकराने प्रेयसीसोबत पळून जायचे असताना प्रेयसीला मृत भासवायचे होते. म्हणून यासाठी त्याने या महिलेची हत्या केली आणि प्रेयसीचे कपडे घालत प्रेत अर्धवट जाळून टाकले होते. यानंतर पोलिसांनी याप्रकरणाचा तपास केला आणि आरोपीला गजाआड केले.
अनं पोलीस-मुलामध्ये तयार झाले अनोखे नाते -
मृत महिलेच्या कुटुंबाला पोलिसांनी आधार दिल्याने मुलांमध्ये आणि पोलीस कर्मचाऱ्यांमध्ये वेगळेच नाते निर्माण झाले आहे, असे सहाय्यक पोलीस निरीक्षक महेश आंधळे यांनी सांगितले. पोलीस कर्मचारी आणि अधिकारी वेळ मिळाल्यावर मुलांना न विसरता भेटायला जातात. 4 महिन्यांपूर्वी बालिकाश्रमात दाखल केलेले हे चिमुकले दुःखातून हळूहळू बाहेर पडत आहेत.
