धक्कादायक...मराठवाड्यात 9 महिन्यात 656 शेतकऱ्यांच्या आत्महत्या

निवडणुकीच्या काळात शेतकऱ्यांसाठी मोठमोठ्या घोषणा केल्या गेल्या. अतिवृष्टीमुळे झालेल्या नुकसान पाहण्यासाठी राजकीय नेत्यांनी पाहणी दौरे केले. मात्र, प्रत्यक्षात सरकार राबवत असलेल्या योजना, पाहणी दौरे याचा कुठलाच परिणाम होत नसल्याचे चित्र मराठवाड्यात आहे.

औरंगाबाद- दुष्काळ असो की, अतिवृष्ठी दोन्ही शेतकऱ्यांच्या जीवावर उठल्याचे चित्र मराठवाड्यात पाहायला मिळत आहे. कधी दुष्काळ तर कधी अतिवृष्टीमुळे खचलेला शेतकरी आत्महत्येचे पाऊल उचलत असल्याचे समोर आले आहे. मराठवाड्यात 9 महिन्यात 656 शेतकऱ्यांनी आपली जीवनयात्रा संपवल्याचे धक्कादायक वास्तव समोर आले आहे.

हेही वाचा - कॅन्सरग्रस्तांसाठी युवतीने केले आपले केस दान

निवडणुकीच्या काळात शेतकऱ्यांसाठी मोठमोठ्या घोषणा केल्या गेल्या. अतिवृष्टीमुळे झालेल्या नुकसान पाहण्यासाठी राजकीय नेत्यांनी पाहणी दौरे केले. मात्र, प्रत्यक्षात सरकार राबवत असलेल्या योजना, पाहणी दौरे याचा कुठलाच परिणाम होत नसल्याचे चित्र मराठवाड्यात आहे. मराठवाड्यात सर्वाधिक शेतकऱ्यांच्या आत्महत्या बीड जिल्ह्यात झाल्याचे समोर आले आहे.

हेही वाचा - जुळ्या मुलींना आयसीयूत सोडून मातेचे पलायन

आत्महत्येसारखे प्रकार घडू नयेत, यासाठी ठोस उपाययोजना राबवायच्या सोडून, आत्महत्या झाल्यावर तुटपुंजी मदत दिली जाते. सततची नापिकी, दुष्काळ तर कधी अतिवृष्टी यामुळे शेतकरी खचत जात आहे. शासनाच्या उदासीनतेमुळे शेतकऱ्यांच्या आत्महत्यामध्ये वाढ होत आहे. पेरणीसाठी कर्ज, कधी दुबार पेरणीसाठी कर्ज, त्यातही नुकसान झालं तर विमा कंपन्या विविध निकष लावून करत असलेली हेळसांड यामुळे शेतकऱ्यांचा कोणावरही विश्वास राहिला नसल्याचे प्रथमदर्शनी दिसून येत आहे.

सप्टेंबरपर्यंत शेतकऱ्यांनी केलेल्या आत्महत्येची आकडेवारी -

1. औरंगाबाद - 100
2. जालना - 73
3. परभणी - 58
4. हिंगोली - 26
5. नांदेड - 86
6. बीड - 145
7. लातूर - 72
8. उस्मानाबाद - 96