विदर्भाची पंढरी असलेल्या कौडण्यपुरातील रुख्मिणीची पायदळ पालखी पंढरपूरसाठी रवाना

कौडण्यपूरला विदर्भातील प्रतिपंढरपूर म्हटले जाते. येथील रुख्मिणीची पालखी दरवर्षी आषाढी एकादशीसाठी पंढरपूरला पायी जात असते. रविवारी सायंकाळी 5 वाजता अमरावतीमध्ये पालखी दाखल होणार आहे.

अमरावती- जिल्ह्यातील रुख्मिणीचे माहेर कौडण्यपूरला विदर्भातील प्रतिपंढरपूर म्हटले जाते. कौडण्यपूर हे ठिकाण तिवसा तालुक्यात आहे. भाविकांची व वारकरी सांप्रदायातील नागरिकांची येथे दररोज गर्दी राहते. येथील रुख्मिणीची पालखी दरवर्षी आषाढी एकादशीसाठी पंढरपूरला पायी जात असते.

यावर्षी गुरुवारी सायंकाळी सर्व वारकरी मिळून विठ्ठल रुख्मिणीची पायदळ पालखी पंढरपूरच्या दिशेने निघाली आहे. कौडण्यपूरातील रुख्मिणीच्या पालखीने यावर्षी 425 व्या वर्षात पदार्पण केले. ही पालखी सन 1594 पासून निघत आहे. महाराष्ट्रातील ही पहिलीच इतकी जूनी पालखी आहे. पालखीचे आगमन रविवारी सायंकाळी 5 वाजता अमरावतीमध्ये दाखल होणार आहे. यावेळी तिवसा मतदारसंघाच्या आमदार यशोमती ठाकूर यांच्या उपस्थितीत पालखीची शासकीय महापुजा व पालखीचे जंगी स्वागत होणार आहे. यावेळी विभागीय आयुक्त, जिल्हाधिकारी, पोलीस आयुक्त, पोलीस अधीक्षक आदी शासनाचे प्रतिनिधी उपस्थित राहणार आहेत.