अखिल भारतीय मराठी साहित्य संमेलनामध्ये वऱ्हाडी भाषेला मानाचे स्थान मिळवून देणार - श्याम ठक

संत गाडगेबाबा अमरावती विद्यापीठात तिसऱ्या अखिल भारतीय वऱ्हाडी साहित्य संमेलनाचे आयोजन करण्यात आले. अखिल भारतीय मराठी साहित्य संमेलनामध्ये वऱ्हाडी बोली भाषेला मानाचे स्थान मिळालेले नाही, त्यासाठी प्रयत्न करणार असल्याची प्रतिक्रिया श्याम ठक यांनी दिली.

अमरावती - संत गाडगेबाबा अमरावती विद्यापीठ आणि अखिल भारतीय वऱ्हाडी साहित्य मंच अकोला यांनी संयुक्तपणे तिसरे अखिल भारतीय वऱ्हाडी साहित्य संमेलन आयोजित करण्यात आले. वऱ्हाडी या बोली भाषेला मराठी साहित्यामध्ये मानाचे स्थान मिळवून देण्यासाठी प्रयत्न करणार असल्याची प्रतिक्रिया वऱ्हाडी साहित्य मंचांचे श्याम ठक यांनी व्यक्त केली.

वऱ्हाडी भाषेची पुणे-मुंबईकर खिल्ली उडवत असल्याचा अनुभव श्याम यांना आला. या प्रकारामुळे व्यथित झालेल्या श्याम यांनी आपल्या अकोल्यातील भाषाप्रेमी सवंगड्यांसोबत मिळून अखिल भारतीय वऱ्हाडी साहित्य मंचाची स्थापना केली. याच मंचाच्या माध्यमातून 2018 मध्ये पहिले अखिल भारतीय वऱ्हाडी साहित्य संमेलनाचे आयोजनही केले. यातून हळूहळू वऱ्हाडी भाषेचा प्रचार आणि प्रसार करण्याचे काम होत आहे.

हेही वाचा - मराठवाड्यात पहिल्यांदाच नव्हे, तर यापूर्वीही झाले होते साहित्य संमेलन

वऱ्हाडी भाषेत लिखाण करणाऱ्या नवोदित लेखकांना संधी मिळावी. त्यांना हक्काचे व्यासपीठ मिळावे यासाठी प्रयत्न सुरू आहेत. अखिल भारतीय मराठी साहित्य संमेलनामध्ये वऱ्हाडी बोली भाषेला मानाचे स्थान मिळालेले नाही. मात्र, येणाऱ्या काळात मराठी साहित्य संमेलनात वऱ्हाडी भाषेला महत्त्व प्राप्त व्हावे यासाठी मंचाच्या वतीने पाठपुरावा केला जाईल, असे श्याम ठक यांनी सांगितले.

विठ्ठल वाघ यांनी वऱ्हाडी भाषेतील लिखाण थांबवल्यानंतर वऱ्हाडी भाषा संपली, असा समज आहे. मात्र, मराठी प्रमाणेच वऱ्हाडी भाषेचे वैभव हे न संपणारे आहे. वऱ्हाडी भाषेच्या समृद्धीसाठी एक शब्दकोशही तयार करण्यात आला आहे. परदेशात असणाऱ्या कुठल्याही व्यक्तीला वऱ्हाडी भाषा याद्वारे सहज कळू शकते. वऱ्हाडी बोलीभाषेतील पोर्टल सुरू करण्याची प्रकिया सुरू करण्यात आली आहे, अशी माहिती श्याम ठक यांनी दिली.