अमरावती -राज्यातील सर्व मंदिर उघडण्यात आल्याने कौंडण्यापूर येथील विठ्ठल रुक्मिणीच्या मंदिरात वंचित बहुजन आघाडीच्या कार्यकर्त्यांनी दर्शन घेतले. यावेळी त्यांनी मुख्यमंत्री उद्धव ठाकरे यांच्या निर्णयाचे स्वागत केले. मंदिर उघडण्यासाठी वंचितचे नेते प्रकाश आंबेडकर यांनी आंदोलन केले होते. त्याची सरकारने दखल घेतली, असेही वंचितच्या कार्यकर्त्यांनी सांगितले. यावेळी कौंडण्यापूरच्या मंदिरात विठ्ठल रुक्मिणीची त्यांनी विधीवत पूजा केली.
कौंडण्यापूर विठ्ठल रुक्मिणी मंदिर वंचित बहुजन आघाडी कोरोनाच्या पार्श्वभूमीवर मागील आठ महिन्यांपासून राज्यातील सर्वच धार्मिक स्थळं बंद होती. परंतु आता राज्यातील कोरोना रुग्णाची संख्या कमी होत असल्याने सरकारने धार्मिक स्थळं उघडण्याची मागणी केली आहे. भाजपा आणि वंचित बहुजन आघाडीने मंदिरं उघडण्याची मागणी केली होती. यासाठी काही ठिकाणी आंदोलनं देखील करण्यात आली. अखेर मुख्यमंत्री उद्धव ठाकरेंनी पाडव्याच्या शुभमुहूर्तावर देवस्थानं उघडण्याची परवानगी दिली. त्याच पार्श्वभूमीवर वर्धा नदीच्या काठी असलेले माता रुक्मिणीचे माहेर घर कौंडण्यपूर देखील भाविकांसाठी खुले करण्यात आले आहे. यावेळी वंचित बहुजन आघाडीच्या कार्यकर्त्यांनी आनंद व्यक्त करत रुक्मिणीचे दर्शन घेतले. विदर्भाची पंढरी म्हणून ओळख
माता रुक्मिणीचे माहेरघर असलेल्या कौंडण्यपूरची विदर्भाचे पंढरपूर म्हणून ओळख आहे. जे भाविक पंढरपूरला दर्शन घ्यायला जाऊ शकत नाहीत. ते कौंडण्यपूरला येऊन माता रुक्मिणीचे दर्शन घेतात. याच ठिकाणी श्रीकृष्णाने माता रुक्मिणीचे हरण केल्याची आख्यायिका आहे. दिवाळीनंतर कार्तिक महिन्यात कौंडण्यपुरात मोठा सोहळा भरतो. या सोहळ्या दरम्यान तब्बल आठ दिवस येथे मोठी जत्रा भरते.
