अमरावती- डिसेंबरच्या पहिल्या आठवड्यात शहरासह जिल्ह्यात अचानक थंडीचा जोर वाढला आहे. तापमान अचानक घटल्याने नागरिकांना कडाक्याची थंडी जाणवू लागली आहे. ग्रामिण भागातील लोक शेकोट्या पेटवून थंडीपासून स्वत:चे रक्षण करीत आहे. पुढील चार-पाच दिवस थंडीचा जोर कायम राहणार असल्याचे हवामान खात्याने सांगितले आहे.
शेकोटी पेटवून ऊब घेताना नागरिक
मागील आठवड्यात जिल्ह्यातील तापमान १७ ते १४.४ अंशापर्यंत घसरले होते. मात्र, त्याचा फारसा परिणाम नागरिकांना जाणवला नाही. मात्र, अचानक तापमान ३.५ अंशांनी घटल्यामुळे थंडीचा कडाका जाणवायला लागला आहे. सकाळच्या वेळी धुके पडले असून थंडीचा जोर कायम आहे. तर थंडीमुळे ग्रामीण भागात ठिकठिकाणी शेकोट्या पेटवून नागरिकांकडून गप्पांचा फंड रंगवतानाचे चित्र सध्या पाहायला मिळत आहे. तर, थंडीमुळे रब्बी पिकालासुद्धा चांगला फायदा होणार असल्याचे बोलले जात आहे.