शिवशाही अपघाताचे सत्र सुरूच... अमरावतीत स्कूल व्हॅनला धडक

अचानक थांबल्यामुळे शिवशाही बसची जोरदार धडक स्कूल व्हॅनला बसली. या अपघातात स्कूल व्हॅनमधील दोन विद्यार्थ्यांना किरकोळ दुखापत झाली.

अमरावती- गर्ल्स हायस्कूल चौक ते माळ टेकडी मार्गावर एका रिक्षाने कट मारल्यामुळे दुचाकीस्वार दुचाकीसह खाली पडला. समोर दुचाकीस्वार पडल्यामुळे मागून येणाऱ्या स्कूल व्हॅन चालकाने अचानक ब्रेक दाबला आणि गाडी थांबवली. त्यामुळे मागून येणारी शिवशाही बस समोरील स्कूल व्हॅन जोरात आदळली. या अपघातात स्कूल व्हॅनमधील दोन विद्यार्थ्यांना किरकोळ दुखापत झाली.

हेही वाचा -अमरावतीत पोलीस व्हॅनची कारला धडक; तिवसा पोलिसात गुन्हा दाखल

दरम्यान, शिवशाही बस दर्यापूरहून नागपूरला जाणार होती. अपघातावेळी ही बस अमरावती बस स्थानकाकडे निघाली होती. मागील काही दिवसांपासून शिवशाही बसच्या अपघातात वाढ होत असल्याचे चित्र आहे.

घटनेची माहिती मिळताच गाडगेनगर पोलीस घटनास्थळी पोहोचले होते. पोलिसांनी शिवशाही बससह स्कूल व्हॅन जप्त केली असून पोलीस ठाण्यात आणली आहे. पोलीस याप्रकरणाचा तपास करत असल्याची माहिती गाडगेनगर पोलीस ठाण्याचे पोलीस निरीक्षक मनीष ठाकरे यांनी 'ईटीव्ही भारत' शी बोलताना दिली.