थरारक..! पैसे देऊनही घराचे काम न केल्याने बांधकाम मिस्त्रीची केली हत्या

पैसे देऊनही घराचे बांधकाम होत नसल्याने संतप्त युवकाने धारधार शस्त्राने बांधकाम करणाऱ्या मिस्त्रीची हत्या केली. आज मंगळवारी सायंकाळी नांदगाव पेठ पोलीस ठाण्याच्या हद्दीत येणाऱ्या पोटे तौनशीपमध्ये ही घटना घडली.

अमरावती- येथे पैसे देऊनही घराचे बांधकाम होत नसल्याने संतप्त युवकाने धारधार शस्त्राने बांधकाम करणाऱ्या मिस्त्रीची हत्या केली आहे. आज मंगळवारी सायंकाळी नांदगाव पेठ पोलीस ठाण्याच्या हद्दीत येणाऱ्या पोटे तौनशीपमध्ये ही घटना घडली. यामुळे परिसरात खळबळ उडाली आहे.

शरद रामराव भटकर (वय 42 रा. कठोरा) असे मृताचे नाव असून सिद्धार्थ वानखडे असे आरोपीचे नाव आहे. घटनेनंतर आरोपीने घटनास्थळावरुन पोबारा केला आहे. पोलीस त्याचा शोध घेत आहेत. शरद भटकर हा मिस्त्री काम करत होता. पोटे तौनशीप येथे सिद्धार्थ वानखडे यांचे घर बांधण्याचे काम त्याने घेतले होते. काम सुरू करण्यापूर्वी शरद भटकर याने सिद्धार्थकडून पैसेही घेतले होते. काम लवकरच सुरू करतो, मला आणखी पैसे हवे आहेत, असे शरद भटकर यांनी सिद्धार्थ वानखडे याला म्हणताच दोघात चांगलाच वाद झाला. रागाच्या भरात सिद्धार्थ वानखडेने धारधार शस्त्राने शरद भटकरवर वार करुन पोबारा केला. जखमी शरद भटकरला जिल्हा सामान्य रुग्णालयात दाखल केले. मात्र, डॉक्टरांनी त्याला मृत घोषित केले. घटनेची माहिती मिळताच नांदगाव पेठ पोलीस ठाण्याचे पोलीस निरीक्षक गोरखनाथ गांगुर्डे यांनी घटनास्थळी पोचून पंचनामा केला. आरोपी सिध्दार्थ वानखडे याचा पोलीस शोध घेत आहेत.