उद्धव ठाकरे चूक दुरुस्त करा.. मंदिरालय शब्दावरील अनुस्वाराचा तुम्हाला विसर; खासदार नवनीत राणांचा सल्ला

राज्यातील मंदिरे सुरू करण्यावरून विरोधक आक्रमक भूमिका घेत आहेत, त्याच प्रमाणे भाजपने संसदीय समितीवर नियुक्ती केलेल्या खासदार नवनीत राणा यांनी देखील आता मंदिर उघडण्याच्या मागणीवरून उद्धव ठाकरेंवर खोचक टीका केली आहे.

अमरावती- राज्यात सध्या नवरात्राचा उत्सव सुरू आहे. मात्र, सर्वत्र देवीची मंदिरे बंद असल्याने महिलांना मंदिरात जाऊन देवीचे दर्शन घेता येत नाही. यावरूनच खासदार नवनीत राणा यांनी मुख्यमंत्री उद्धव ठाकरे यांना चूक दुरुस्त करण्याचा खोचल सल्ला दिला आहे. मुख्यमंत्र्यांना मंदिरालयच सुरू करायचे होते, परंतु ते मंदिरालयाच्या 'म' वरील अनुस्वार द्यायला विसरले आणि त्यांनी मदिरालय सुरू केले, अशी खोचक टीका खासदार राणा यांनी केली. तसेच उद्धव ठाकरे यांनी आपली चूक दुरुस्त करावी आणि मंदिर तत्काळ सुरू करावीत, असा सल्ला खासदार नवनीत राणा यांनी मुख्यमंत्री उद्धव ठाकरे यांना दिला आहे.

सध्या महाराष्ट्रात मंदिर सुरू करावी, यासाठी भाजप आणि भाजपपुरस्कृत लोकप्रतिनिधींकडून वेग वेगळ्या ठिकाणी आंदोलने सुरू आहेत. त्यासंबंधी राज्यपाल भगतसिंग कोश्यारी यांनी देखील मुख्यमंत्री उद्धव ठाकरे यांना एक पत्रही लिहिले होते. त्यामुळे आता मुख्यमंत्र्यांनी आपली चूक दुरुस्त करावी आणि मंदिर लवकरात लवकर सुरू करावी, असा सल्ला नवनीत राणा यांनी ठाकरे यांना दिला आहे.नवनीत राणा या मागील काही महिन्यांपासून सातत्याने मुख्यमंत्री उद्धव ठाकरे यांच्यावर टीकेची झोड उडवत आहेत. त्यामुळे संतप्त शिवसेना कार्यकर्त्यांनी नवनीत राणा आणि रवी राणा यांच्या पोस्टरला जोडे मारले होते. त्यानंतर याला प्रत्युत्तर म्हणून युवा स्वाभिमानच्या कार्यकर्त्यांनी मुख्यमंत्री उद्धव ठाकरे यांचे पोस्टर जाळून निषेध व्यक्त केला होता.