अमरावती - पावसाळा ऋतू गिर्यारोहकांसाठी एक पर्वणीच असतो. निसर्गाच्या सानिध्यात व दऱ्याखोऱ्यात असलेल्या मेळघाटात दरवर्षी हजारो गिर्यारोहक हे ट्रेकिंगसाठी येतात. ट्रेकिंगसाठी आलेला एक गट पूरात अडकला होता. नागपूर, अमरावती, पुलगाव, परतवाडा आदी ठिकाणाहून आलेल्या ५०पेक्षा अधिक गिर्यारोहकांनी व पर्यटकांनी मेळघाटाच्या कलाकुंड बगदारी नदीच्या पुरातून एकमेकांचा जीव वाचवला.
गिर्यारोहकांनी पर्यटकांना पुरातून सुखरुप बाहेर काढले
गेल्या रविवारी सुटीचा दिवस असल्याने काही गिर्यारोहक हे मेळघाटामध्ये आले होते. सकाळच्या सुमारास हे गिर्यारोहक दाखल झाले तेव्हा वातावरण कोरडे होते त्यामुळे त्यांनी ट्रेकिंगला सुरुवात केली. मात्र, हे सर्वजण कलाकुंडच्या बगदारी धबधब्याजवळ पोहचल्यानंतर अचानक पाऊस सुरू झाला. जोरदार पावसामुळे धबधब्याचा पाण्याचा प्रवाह वाढला. त्यामुळे दीड तास हे गिर्यारोहक व पर्यटक त्याठिकाणी अडकून पडले होते.