आमदार रवी राणा यांची सुटका; आता मोर्चा मातोश्रीवर

आमदार रवी राणा यांच्या सुटकेसाठी खासदार नवनीत राणा यांच्यासह युवा स्वाभिमान पक्षाचे कार्यकर्ते राजकमल चौक येथे ठिय्या आंदोलनाला बसले असतानाच रवी राणा यांना जामीन मिळाला असून यांच्या सुटकेची माहिती आली.

अमरावती- अतिवृष्टीमुळे अडचणीत असणाऱ्या विदर्भातील शेतकऱ्यांना शासनाने मदत करावी, या मागणीसाठी शुक्रवारी गुरुकुंज मोझरी येथे आंदोलन करणाऱ्या आमदार रवी राणा यांना अटक करण्यात आली होती. आज न्यायालयाने त्यांची जामिनावर मुक्तता केली आहे. आमदार रवी राणा यांच्या सुटकेसाठी खासदार नवनीत राणा यांच्यासह युवा स्वाभिमान पक्षाचे कार्यकर्ते राजकमल चौक येथे ठिय्या आंदोलनावर बसले असतानाच आमदार रवी राणा यांना जामीन मिळाला असून यांच्या सुटकेची माहिती आली. दरम्यान शेतकऱ्यांना न्याय देण्यास अपयशी ठरणाऱ्या सरकारच्या निषेधात युवा स्वाभिमान पक्षाच्यावतीने मुख्यमंत्र्यांचा पुतळा जाळण्यात आला. आता उद्या शेतकऱ्यांसाठी थेट मातोश्रीसमोर आंदोलन करणार, असा इशारा कारागृहातून बाहेर येताच रवी राणा यांनी दिला.

जयस्तंभ ते राजकमल चौकापर्यंत मोर्चा

जयस्तंभ चौक येथील महात्मा गांधींच्या पुतळ्याला खासदार नवनीत राणा यांनी अभिवादन केल्यावर युवा स्वाभिमान पार्टीच्या कार्यकर्त्यामसह खासदार नवनीत राणा यांनी राजकमल चौकापर्यंत मोर्चा कडला. यावेळी राज्य सरकारविरोधात घोषणाबाजी करण्यात आली.

पोलिसांचा कडेकोट बंदोबस्त

खासदार नवनीत राणा यांच्या आंदोलनाच्या पार्श्वभूमीवर राजकमल चौक, जयस्तंभ चौक आणि कोविड कारागृह असणाऱ्या डॉ. नरेंद्र भिवापूरकर अंध विद्यालय परिसरात पोलिसांचा कडेकोट बंदोबस्त लावण्यात आला होता. पोलीस उपायुक्त शशिकांत सातव हे स्वतः परिस्थितीवर लक्ष ठेऊन होते.

मुख्यमंत्र्यांचा पुतळा जाळला

खासदार नवनीत राणा यांनी राजकमल चौकात ठिय्या आंदोलन केले असताना कार्यकर्त्यांनी एका वाहनात लपवून आणलेला मुख्यमंत्र्यांचा प्रतिकात्मक पुतळा पोलिसांनी मोठ्या शिताफीने जप्त केला. दरम्यान, एक पुतळा जप्त झाल्यावर कार्यकर्त्यांनी लगेच दुसरा पुतळा आणून गांधी चौक मार्गावर जाळला. या सर्व प्रकारामुळे राजकमल चौक परिसरात मोठा गोंधळ उडाला.

उद्या मातोश्रीवर धडक

शेतकऱ्यांना योग्य नुकसान भरपाई मिळावी, या मागणीसाठी आंदोलन सुरूच राहणार आहे. आम्ही उद्या मातोश्रीवर जाऊन मुख्यमंत्र्यांची भेट घेणार आहे. मुख्यमंत्र्यांनी भेट नाकारली तर शेतकऱ्यांसोबत मातोश्रीसमोरच आंदोलन छेडणार, असा इशारा आमदार रवी राणा यांनी दिला आहे.