अमरावती- मागील एक महिन्यापासून दिल्लीत सुरू असलेल्या शेतकऱ्यांच्या आंदोलनाला पाठिंबा देण्यासाठी अखिल भारतीय किसान सभेचे हजारो कार्यकर्ते आणि शेतकरी दिल्लीला निघाले आहेत. ते आज सकाळी अमरावती जिल्ह्यात दाखल झाले आहेत. तर अनेक शेतकरी हे रात्रीपासूनच तुकडोजी महाराज यांची कर्मभूमी असलेल्या गुरुकुंज मोझरी मध्ये मुक्कामाला होते. आज दुपारी तुकडोजी महाराज यांचं दर्शन घेऊन हे हजारो कार्यकर्ते नागपूर आणि तेथून दिल्लीच्या दिशेने रवाना होणार आहेत, याबाबतचा आढावा घेतला आहे ईटीव्ही भारतचे प्रतिनिधी स्वप्निल उमप यांनी..
किसान सभेचे शेकडो शेतकरी दिल्लीच्या वाटेवर केंद्र सरकारने नव्याने लागू केलेल्या तीन कृषी कायद्या विरोधात मागील एक महिन्या पेक्षा जास्त कालावधीपासून दिल्लीच्या सीमेवर पंजाब, हरियाणातील लाखो शेतकरी आंदोलन करीत आहे. या आंदोलनाला पाठिंबा देण्यासाठी राज्यातील अखिल भारतीय किसान सभेच्या वतीने हजारो कार्यकर्ते आणि शेतकरी हे दिल्लीच्या दिशेने रवाना झाले आहेत. राज्यातील कोल्हापूर, नाशिक अहमदनगर यासह अन्य काही जिल्ह्यातून निघालेले हजारो कार्यकर्ते आज सकाळी अमरावती जिल्ह्यात दाखल झाले.
आज मोझरीत होणार सभा-
किसान सभेचे शेतकऱ्यांची आज मोझरी मध्ये जाहीर सभा होणार आहे. त्यानंतर हे कार्यकर्ते नागपूर आणि नागपूरवरून दिल्लीच्या दिशेने रवाना होणार आहेत. चार तारखेला हे आंदोलक शेतकरी दिल्लीमध्ये धडक देणार असल्याची माहिती या आंदोलनात सहभागी झालेल्या शेतकऱ्यांनी दिली आहे.
