अमरावती -सोमवारी होणाऱ्या मतदानासाठी सखी मतदान केंद्रावर तयारी सुरू असतानाच केंद्रप्रमुखाला त्यांच्या आईच्या निधनाची बातमी मिळाली. अमरावती विधानसभा मतदारसंघात गव्हर्मेंट गर्ल्स हायस्कूल हे सखी मतदान केंद्र आहे. येथील केंद्रप्रमुखांच्या आईच्या निधनाची बातमी मिळताच मतदान केंद्रावर शोककळा पसरली.
केसरबाई लाहोटी महाविद्यालयात प्राध्यापक असणाऱ्या माया वाटाणे असे गव्हर्मेंट गर्ल्स हायस्कूल या ठिकाणी असणाऱ्या सखी मतदान केंद्राच्या प्रमुखांचे नाव आहे. त्यांच्या आईची प्रकृती काही दिवसांपासून ढासळली असल्याने त्यांनी निवडणुकीच्या कामात मला सहभागी करू नका, असा अर्ज केला होता. मात्र त्यांचा अर्ज फेटाळून लावून त्यांना अमरावती शहरातील गव्हर्मेंट गर्ल्स हायस्कूल या सखी मतदान केंद्रावर केंद्रप्रमुख म्हणून जबाबदारी सोपविण्यात आली होती.