अमरावती : तिच्या कुटुंबीयांचा होता प्रेमाला विरोध, त्याने गळा चिरून केली प्रेयसीची हत्या

अर्पिताच्या घरच्यांचा प्रेमाला विरोध असल्याच्या कारणावरून आरोपी तुषार मस्करे याने मुधोळकरपेठ परिसरात मैत्रिणीसोबत शिकवणीवरून परत येणाऱ्या अर्पितावर चाकूने १७ वार करत तिची निर्घृण हत्या केली.

अमरावती -कवठा बहाळे येथील रहिवासी अर्पिता ठाकरे आणि मलकापूर पांढरी येथे राहणाऱ्या तुषार मस्करे यांच्या प्रेमप्रकरणाला अर्पिताच्या कुटुंबीयांचा विरोध होता. यामुळे प्रियकर तुषारने तीची गळा चिरून निर्घृन हत्या केली. एवढेच नाही, तर त्याने तिच्यावर चाकूचे तब्बल १७ वार केले आहेत. ही घटना अमरावतीतील चुनाभट्टी ते मुधोळकरपेठ परिसरात घडली. या घटनेनंतर परिसरातील युवकांनी तुषारला चोप देऊन पोलिसांच्या स्वाधीन केले.

मुधोळकरपेठ परिसरात मंगळवारी दुपारी 2.45 वाजण्याच्या सुमारास मैत्रिणीसोबत शिकवणीवरून परत येणाऱ्या अर्पितावर तुषारने चाकूने वार केला. मुधोळकरपेठ परिसरातील युवक तुषारला रोखण्यासाठी धावेपर्यंत त्याने अर्पिताच्या अंगावर चाकूने 17 वार केले होते. रक्ताच्या थारोळ्यात पडलेल्या अर्पिताला सागर बीजवे या युवकाने उचलून जिल्हा सामान्य रुग्णालयात नेले तर काही युवकांनी तुषारला पकडून त्याला चांगला चोप देऊन राजापेठ पोलिसांच्या स्वाधीन केले.

या घटनेनंतर पोलीस आयुक्त संजय बाविस्कर, पोलीस उपायुक्त शशिकांत सातव, यशवंत सोळंके हे राजापेठ पोलीस ठाण्याला पोहचले आणि या संपूर्ण प्रकरणाची त्यांनी माहिती घेतली.

गत तीन वर्षांपासून तुषार मस्करे आणि अर्पिता ठाकरे यांचे प्रेमप्रकरण सुरू होते. त्यांच्या प्रेमप्रकारणाला अर्पिताच्या घरच्यांचा विरोध होता. अर्पिता अल्पवयीन असल्याने ते दोघे लग्नही करू शकत नव्हते. अर्पिताच्या घरच्यांचा विरोध वाढला असताना तुषारने आज चक्क आपल्या प्रेयसीचीच हत्या केली, अशी माहिती पोलीस उपयुक्त शशिकांत सातव यांनी पत्रकारांना दिली.
या घटनेमुळे शहरात खळबळ उडाली असून युवतींच्या सुरक्षिततेबाबतचा प्रश्नही ऐरणीवर आला आहे.