अमरावतीDiwali 2023 Amravati : समाजाची सेवा करण्याच्या खूप साऱ्या पद्धती आहे. पण त्यातही अन्नदान अधिक श्रेष्ठ आहे. म्हणतात ना की, माणूस भरल्या पोटी विचार करतो अन् उपाशी पोटी भांडण करतो. ज्यांना खऱ्या अर्थानं गरज आहे, अशा गरजूंपर्यंत आपली सेवा पोहोचली तरंच त्या सेवेचं फलित असते. अमरावतीत अशीच एक सेवा विठ्ठल सोनवळकरांनी सुरू केली. ती म्हणजे अन्नदान करण्याची सेवा! अंध, अनाथ आणि दिव्यांगांना आपल्या पोळी भाजी केंद्रातून मोफत भोजन देण्याचा उपक्रम सोनवळकर हे गेल्या 34 वर्षांपासून राबवित आहेत.
दोन दिवस पुरणपोळीचं वाटप :सणांचा राजा म्हणून दिवाळी या सणाची ओळख आहे. भारतीय संस्कतीमध्ये या सणाला विशेष महत्त्व आहे. बेघर, अनाथ लोकांना दिवाळीच्या दिवशी गोड धोड खायला मिळावं, तसंच त्यांचा आनंद द्विगुणित व्हावा यासाठी सोनवळकर हे पुरणपोळीचे वाटप करतात. गेल्या 34 वर्षांपासून राष्ट्रीय तसंच भारतीय संस्कृतीतील मोठ्या सणांना शहरातील दीन-दुबळ्यांना मोफत मिष्टान्नाचं भोजन देण्याचा सोनवळकरांचा उपक्रम सुरू आहे. यावर्षीदेखील 10 अन् 11 नोव्हेंबरला दिवाळीनिमित्त भाजी पोळी केंद्रात ते पुरणपोळीचे मोफत वाटप करणार आहेत.
- 34 वर्षांपासून अविरत सेवा : विठ्ठल सोनवळकर हे एका हातगाडीवर गॅस वेल्डिंगचा व्यवसाय करतात. शहरातील कॉटन मार्केटलगत वालकट कंपाउंड परिसरात मागील 40 वर्षांपासून ते हा व्यवसाय करतात. या एवढ्याशा व्यवसायाच्या भरवशावर ते रुग्णालयात उपचार घेत असलेल्या रुग्णांच्या नातेवाइकांना पाच रुपयांत तीन पोळ्या अन् वाटीभर डाळभाजी मोफत देतात.