अमरावतीच्या जिल्हा शल्यचिकित्सकांनी कोरोनाकाळात केला भ्रष्टाचार - मनसे

कोरोनाकाळात अमरावतीचे वादग्रस्त जिल्हा शल्यचिकित्सक डॉ. शामसुंदर निकम हे भ्रष्टाचार करण्यात गुंतले आल्याचा खळबळजनक आरोप महाराष्ट्र नवनिर्माण सेनेने केला आहे.

अमरावती -कोरोनामुळे अमरावती जिल्ह्यात अनेकांचे बळी जात असताना कोरोनाकाळात अमरावतीचे वादग्रस्त जिल्हा शल्यचिकित्सक डॉ. शामसुंदर निकम हे भ्रष्टाचार करण्यात गुंतले आल्याचा खळबळजनक आरोप महाराष्ट्र नवनिर्माण सेनेने केला आहे. यासंदर्भात पुरावे सुद्धा पत्रकार परिषदेत सादर करण्यात आले आहे.

जिल्हा कोषागार अधिकाऱ्यांनी उपस्थित केला प्रश्न -

डॉ. शामसुंदर निकम हे चार वर्षांपासून जिल्हा शल्यचिकित्सक, प्रशकीय अधिकारी, जिल्हा महिला रुग्णालय प्रमुख आणि सुपर स्पेशालिटी रुग्णालय प्रमुख अशी चार पदे सांभाळत आहे. या सगळ्या जबाबदारीचा गैरफायदा घेत सगळ्या देयकांवर प्रशासकीय अधिकारी आणि जिल्हा शल्यचिकित्सक या दोन्ही स्वाक्षऱ्या एकाच व्यक्तीच्या असतात याबाबत जिल्हा कोषागार अधिकारी कवलजीत सिंग यांनी आक्षेप घेतला असून या संदर्भात 3 फेब्रुवारी 2021 रोजी पत्र देऊन जिल्हाधिकारी शैलेश नवल यांनाही कळविले होते.

बोगस बील लावून खरेदी -

शासन निर्णयानुसार 3 लाखापेक्षा अधिक किंमतीच्या खरेदीसाठी ई-निविदा काढणे बांधकारक आहे. 23 लाख 15 हजार, 801 रुपयांच्या औषधी खरेदी करण्यासाठी हाफकीन कंपनीकडून औषधे खरेदी करणे आवश्यक असताना राजेश फार्मा, एकर्ड सेल्स, सर्जीको हेल्थ, गुणवंत फार्मसिटीकल, सुवर्णा एजन्सी, एस.एम.एजन्सी यांच्या मार्फत दरात न लावता खरेदी करण्यात आले. या व्यवहारात क्रमांक 347 ते 310 पर्यंतचे बील खरे लावण्यात आले आहे. तर क्रमांक 209 ते 261 पर्यंत बोगस बील लावून औषध खरेदी करण्यात आली. या सर्व गंभीर प्रकाराबाबत जिल्हा कोषागार अधिकाऱ्यांनी जिल्हाधिकाऱ्यांकडे तक्रार केल्याचे पत्रही मनसेचे जिल्हा संघटक पप्पू पाटील यांनी पत्रकार परिषदेत सादर केले.

ऑक्सिजन प्लँटसाठी गरज नसताना दिले आगावू देयक -

सुपर स्पेशालिटी हॉस्पिटलमध्ये ऑक्सिजन जनरेश प्लँट तातडीने उभारण्यासाठी काढण्यात आलेली ई-निविदा रद्द करून डॉ. शामसुंदर निकम यांनी औरंगाबाद येथील एरॉक्स टेक्नॉलॉजी या कंपनीकडून 1 कोटी 19 लाख रुपयांचा प्लँट खरेदीसाठी वर्कऑर्डरमध्ये 5 टक्के रक्कम देण्याची अट असताना डॉ. निकम यांनी 60 टक्के प्रमाणे एकूण 70 लाख रुपये आगाऊ रक्कम दिली. महिना उलटूनहू कंपनीने प्लँट उभा केला नाही. मात्र, आम्ही 3 वर्षापर्यंत प्लँट उभारू शकत नाही. यामुळे आम्ही न मागता तुम्ही दिलेली रक्कम परत पाठवतो आहे, असे पत्र 25 मे रोजी एरॉक्स टेक्नॉलॉजी या कंपनीने जिल्हा शल्यचिकित्सकांना पाठवले आहे.

जिल्हाधिकाऱ्यांचे जिल्हा शल्यचिकित्सकांसोबत साटेलोटे -

31 मे 2021 ला सेवानिवृत्त झाल्यावर जिल्हा शल्यचिकित्सक डॉ. शामसुंदर निकम यांना त्यांच्या सेवेत एक वर्ष मुदतवाढ मिळाली आहे. या व्यक्तीने 2017 पासून आजपर्यंत अनेक भ्रष्टाचार केल्याचे जिल्हा कोषागार अधिकाऱ्यांनी जिल्हाधिकाऱ्यांना पत्र देऊन कळविले असताना जिल्हाधिकाऱ्यांनी त्याची तक्रार वरिष्ठ पातळीवर करणे अपेक्षित होते. मात्र, जिल्हाधिक्काऱ्यांचे जिल्हा शल्यचिकित्सकांसोबत साटेलोटे असल्याने डॉ. निकम यांचे गंभीर कृत्य दाबण्यात आले. आम्ही या प्रकरणाची तक्रार थेट मुख्यमंत्र्यांकडे करू, असे पप्पू पाटील म्हणाले.