अमरावती -तिवसा ग्रामीण रुग्णालयातील प्रभारी अधीक्षक हे सोफ्यावर झोपून रुग्णांच्या एक्स-रेची पाहणी करत असल्याचा व्हिडिओ सोशल मीडियावर व्हायरल झाला होता. त्यानंतर या व्हिडिओवर विविध प्रतिक्रिया आल्या होत्या. मात्र, प्रकृती अस्वास्थ्यामुळे सोफ्यावर झोपून असल्याचे स्पष्टीकरण डॉक्टरांनी दिले. ज्या तरुणाने हा व्हिडिओ व्हायरल केला, त्या तरुणाने शनिवारी पोलीस ठाण्यामध्ये येत डॉक्टरांची माफी मागून या प्रकरणावर पडदा टाकला आहे.
डॉ. पवन मालुसरे यांनी तिवसा पोलीस ठाण्यामध्ये व्हिडिओ काढणाऱ्या तरुणाविरुद्ध तक्रार दिली. पोलिसांनी संबधित तरुणाला बोलावले असता त्याने पोलिसांची आणि डॉक्टरांची माफी मागितली. डॉ. मालुसरे हे आजारी असल्याने सोफ्यावर आराम करत होते, अशी माहिती जिल्हा शल्य चिकित्सक शामसुंदर निकम यांनी दिली. त्यामुळे मालुसरे यांच्या स्पष्टीकरणाला दुजोरा मिळाला आहे.