अमरावती - गुरुवारी गणपती विसर्जनादरम्यान वाठोडा शुक्लेश्वर येथे पूर्णा नदीत वाहून गेलेल्या चौघांपैकी दोघांचे मृतदेह सापडले आहेत. आज दिवसभर सुरू असणारी शोधमोहीम सायंकाळी थांबवण्यात आली. शनिवारी उर्वरीत दोघांचा शोध घेतला जाणार आहे. दरम्यान, खासदार नवनीत राणा यांनी आज (शुक्रवारी) दुपारी घटनास्थळाला भेट देऊन शोध मोहिमेबाबत माहिती घेतली.
गणपती विसर्जना दरम्यान सतीश सोळंके (वय 28), ऋषिकेश वानखेडे (वय 22), संतोष वानखडे (वय 45) आणि सागर शेंदुरकर (वय 20) हे चारजण नदीत बुडाले होते. या घटनेमुळे वाठोडा शुक्लेश्वरसह संपूर्ण जिल्ह्यात खळबळ उडाली होती. गुरुवारी रात्री जिल्हाधिकारी कार्यालयातील आपत्कालीन बचाव पथक घटनास्थळी रवाना झाले. रात्रभर नदीत बुडालेल्यांचा शोध घेण्यात आला. त्यानंतर, आज सकाळी बचाव पथकाने पुन्हा एकदा शोध मोहीम राबविली असता बारा वाजेच्या सुमारास संतोष वानखेडे यांचा मृतदेह हाती लागला होता. तर, चार वाजेच्या सुमारास सागर शेंदुरकर याचा मृतदेह बचाव पथकाच्या हाती लागला. लगतच्या विश्रोळी धरणाचे दार उघडल्याने पूर्णा नदीला पूर आला होता. या पुरामुळे बचाव पथकाला उर्वरित दोघांचा शोध घेण्यात अडचणी निर्माण झाल्या आहेत. नदीवरील पुलाखाली मोठ्या प्रमाणात वाहून आलेले लाकडे कचरा अडकल्याने तो काढण्यासाठी जेसीबीही बोलविण्यात आले होते. दरम्यान, बचाव पथकाने मोठ्या अडचणीतही शोध मोहीम सुरूच ठेवली. सायंकाळी सहा वाजेपर्यंत सतीश सोळंके आणि ऋषिकेश वानखेडे यांचा शोध घेण्यात आला. अंधार पडल्यामुळे शोधमोहीम थांबविण्यात आली