भाजप आमदार सुनील देशमुख, बाळासाहेब थोरातांमध्ये 'बंदद्वार' चर्चा

14:55 August 26

सुनील देशमुख यांनी काँग्रेसच्या काळात पालकमंत्री व आमदारपद उपभोगले आहे

अमरावती - मुख्यमंत्री देवेंद्र फडणवीस यांची राज्यभर सुरू असलेल्या महाजनादेश यात्रेला प्रतिउत्तर देण्यासाठी काँग्रेसकडून आजपासून महापर्दाफाश यात्रा अमरावतीमधून सुरू झाली. दरम्यान यात्रा सुरू होण्यापूर्वी अमरावती येथील शासकीय विश्रामगृहात भाजपचे आमदार डॉ. सुनील देशमुख यांनी काँग्रेसचे प्रदेशाध्यक्ष बाळासाहेब थोरात यांची भेट घेतली. काही काळ दोघांमध्ये बंदद्वार चर्चा झाली. यामुळे राजकीय वर्तुळात विविध चर्चांना उधाण आले. दरम्यान, ही भेट राजकीय नसून आमची सुनील देशमुख यांच्याशी मैत्री आहे, म्हणून ते भेटायला आले असे स्पष्टीकरण काँग्रेसचे प्रदेशाध्यक्ष बाळासाहेब थोरात यांनी दिले.

सुनील देशमुख यांनी काँग्रेसच्या काळात पालकमंत्री व आमदारपद उपभोगले आहे. मात्र माजी राष्ट्रपती प्रतिभा पाटील यांचे पुत्र रावसाहेब शेखावत यांना विधानसभा निवडणुकीत उमेदवारी मिळाली. त्यामुळे सुनील देशमुख यांनी अपक्ष निवडणूक लढवली होती. मात्र त्यांचा पराभव झाला होता. त्यानंतर सुनील देशमुख यांनी भाजपमध्ये प्रवेश करत गेल्या निवडणुकीत विजय मिळवला. मात्र आता सुनील देशमुख यांची भाजपमध्ये कोंडी होत असल्याचे बोलल्या जाते. त्यामुळे आधीपासूनच काँग्रेस विचारसरणीचे देशमुख हे पुन्हा काँग्रेसमध्ये प्रवेश करतील का ? हा प्रश्न या भेटीने उपस्थित होत आहे.