अमरावती - कोरोना संसर्ग टाळण्यासाठी नागरिकांची गर्दी होणार नाही याची काळजी घेतली जात असताना बुधवारी मुस्लिम बांधवांच्या बकरी ईद सणानिमित्त प्रतिकात्मक कुर्बानी देण्याचे आवाहन जिल्हा प्रशासनाच्यावतीने करण्यात आले होते. त्यामुळे बकऱ्यांच्या खरेदीसाठी गर्दी होऊ नये यासाठी खरेदी - विक्री व्यवहार ऑनलाइन करण्याचे निर्देश देण्यात आले आहे. धार्मिक विधी मशिदीत न करता घरीच करण्याचे आवाहन प्रशासनाच्यावतीने करण्यात आले आहे.
महापालिकेकडून मार्गदर्शक सूचना
बकरी ईदच्या पार्श्वभूमीवर अमरावती महापालिकेने काही मार्गदर्शक सूचना दिल्या आहेत. त्यानुसार कोरोना परिस्थितीचा विचार करता बकरी ईदची नमाज मशिद, ईदगाह किंवा सार्वजनिक ठिकाणी न करता घरीच अदा करावी. जनावरांचा बाजार भरण्यास परवानगी नसल्याने जनावरांची खरेदी ऑनलाइन करावी किंव्हा दूरध्वनीवरून खरेदी करावी. नागरिकांनी शक्यतोवर प्रतिबंधात्मक कुर्बानी करावी. कोरोना संसर्ग टाळण्यासाठी घातलेले निर्बंध कायम असून बकरी ईद निमित्त नियमात कुठलीही शिथिलता देण्यात आली नाही.
कत्तलखान्यांवर बंदी
बकरी ईद निमित्त महापालिकेच्यावतीने दरवर्षी विविध भागात तात्पुरत्या स्वरूपाचे कत्तलखाने उभारले जात होते. कोरोनामुळे यंदा कत्तलखाने सुरू राहणार नसल्याचे महापालिका प्रशासनाच्यावतीने स्पष्ट करण्यात आले आहे.
हेही वाचा -काश्मीर : पोलीस कॉन्स्टेबलच्या पत्नीसह मुलीवर दहशतवाद्यांचा गोळीबार