अमरावती -अभिनेत्री कंगना रणौत विरुद्ध शिवसेना या वादात आता पूर्वाश्रमीच्या अभिनेत्री आणि आता अमरावतीच्या खासदार असलेल्या नवनीत राणा यांनी उडी घेतली आहे. आज मुंबई महानगरपालिकेच्या वतीने कंगनाच्या अनधिकृत बांधकामावर बुलढोजर चालवला गेला. त्यामुळे शिवसेनेवर अनेकांनी टीका केली असतानाच आता नवनीत राणा यांनी ट्विट करत शिवसेनेवर टीका केली आहे.
राज्य सरकार कंगनाच्या कार्यालयाची तोडफोड करत आहे. हा सत्तेच्या ताकदीचा दुरुपयोग सुरू आहे. मुंबई महानगरपालिकेत शिवसेनेची सत्ता आहे, म्हणून अशी हुकुमशाही चांगली नव्हे, असे ट्विट करून राणा यांनी शिवसेनेवर जोरदार टीका केली. शिवसेनेच्याविरूद्ध मैदानात उतरल्याने आता नव्या वादाला तोंड फुटण्याची शक्यता आहे.